Thenzawl Peace City-in a huam tur chinah square kilometre 51.81 chu hmasawnna hna thawh theihna tur a ni dawn a, hei hi a huamchin tur pum atangin zaa 60.95 a ni.
Mizoram Pro-Active Governance and Timely Implementation (Mi-PRAGATI) chu chief minister Lalduhoma kaihhruaiin Thawhtanni khan an thukhawm a. State chhunga hmasawnna hnathawh lian zual thlanchhuah thlirho niin, hna kalmuan chhan, harsatna awm sutkian dan tur leh hmalak zel dan tur sawiho a ni.
Thenzawl Peace City tura master plan buatsaih mek thlirho niin, sq. km 85 (Village Council 6: Thenzawl East, West, South, Kanan, Vengthar leh Buangpui) a huam a, hmasawnna hna thawh theihna hmun (developable area) hi sq. km 51.81 (60.95%) a ni. Hmalakna hmasa atan Early Bird Project hmangin Solid Waste Management System (cheng vaibelchhe 4 senna tur), Dilpui – lake area cheibawlna (vbch.8) leh Saturday Market siamna (vbch.3) thawh tum a ni a. Lau lui tuilian ven leh cheimawi hna vbch.23 hmanga thawh tum a ni bawk.
Swadesh Darshan 2.0 hnuaia cheng vaibelchhe 99.71 senga Central YMA Conference Centre Thingsulthliah chu Mizoram Tourism Development Authority leh PWD hmalaknain sak mek a ni a. Hmun laih zawl leh kawng siam hna tan tawh mah se, fur ruahtui a la tlak tam avangin leivung paih leh hmanraw chawkluh a harsa a, hna a muan phah deuh nia sawi a ni.
Mizo Fiber Grid Network (MFGN) atan SASCI Part-V (2022- 2023) cheng vbch.50 sanction hmanga Mizoram district headquarters zawng zawng thlunzawmna tur OPGW – optical power ground wire (km.543) leh ADSS (km.82) hna Information & Communication Technology department, M/s ZENICS, Ernst & Young LLP leh RailTel ten an thawk mek a. OPGW hi km.24 zo tawhin, ramhnuai kawng tha lo leh ruahtui vanga harsatna awm sutkian dan leh December 2026-a zawh hman dan tur sawiho a ni.
SASCI Part-V (2024- 2025) hnuaia cheng vbch.60 sanction hmanga MINECO-a sawrkar pisa hmunpui, Integrated Office Complex PWD leh Buannel Geo Solution & Services-in an sak mek chu physical progress 15% thawh a ni tawh a; fur lai a nih avangin hna a kal chak thei rih lo tih sawi a ni. He Complex hi commission hrang hrang awmna tura duan a ni.
Mizoram leh Bangladesh inkalpawhna, sumdawnna kawng pawimawh tak ni tur, Pukzing to Silsury kawng laih kna (km.21) hi NESIDS (Roads) cheng vbch. 100.24 sengin PWD-in intermediate lane-in a lai mek a. Physical progress 8.38% ni tawhin, fur ruahtui vangin chak takin kalpui a harsa rih tih sawi a ni. Zangnadawmna chungchanga harsatna awm pawh sawiho niin, kawng hi January 2028-a zawh tura ruahman a ni.
Peace City huam tur chinah hmasawnna hna thawh theihna hmun zaa 60.95 awm
