Pegula lakah Gauff a tlawm

WTA Finals khelh mekah Pathianni khan semi-final khelh a ni a, Jessica Pegula chuan doubles lama a kawppui Coco Gauff a sawp a, final a lut.
Cancun, Mexico-a WTA Finals khelh mekah Pegula a khel tha tluang hle a, semi-final pawh awlsam takin a paltlang zui leh. Pegula hian US Open champion Coco Gauff lakah tha chungchuang takin bul a tan a, set khatnaah break nei zawn nghalin, game hnih chauh a hloh a, awlsam takin set khatna a la. Set hnihnaah Pegula hi a khel tha lehzual a, game khat chiah hloh chungin set a la zui leh a. Doubles lama a kawppui Gauff chu darkar khat chhung lekin 6-2, 6-1 in a hneh hman a, final a lut.
US Open champion Coco Gauff sawptu Jessica Pegula hian Igi Swiatek leh Aryna Sabalenka te inkhela chak zawk zawk a hmachhawn zui leh ang. Swiatek leh Sabalenka te hi Pathianni khan an inhmachhawn a, 2-1 a Swiatek-i’n hma a hruai laiin ruah surin a tibuai a, thawhtana khel chhunzawm turin sawn a ni.