Reale Arena lama Inrinni zan inkhelah Real Madrid chuan second half-a Kylian Mbappe leh Vinicius Junior-te penalty chhuihluh hmangin mualneitu Real Sociedad lakah 2-0 hnehna an chang.
He match-a mikhual goal hmasa zawk hi minute 58-a Vinicius Junior thun niin, Manchester City left-back hlui Sergio Gomez chuan Arda Guler-a ball pet kawh zet chu a kutin a lo khaksawn a, penalty chhawiin, Brazilian Vinicius hian tihsual nei eih lohin goal-ah a chantir a, season kal laia a La Liga goal hnihna a hmin.
Los Blancos goal hnihna pawh penalty atanga lut bawk niin, Vinicius-a hlawhchhuah penalty chu Sociedad keeper Alex Remiro tluklohna lamah Mbappe chuan chhuihin, kumin nipui thawt laia Paris St-Germain chhuahsana Spain a pan hnuah a club thar tan game hnih khelin goal thum a thun tling ta.
Frenchman hian international break hma khan a La Liga goal hmahruai thunin, kartawp game-ah penalty atangin a chhunzawm leh ta a ni.
Sociedad lam pawh hian goal thun theihna hun remchang an nei nual a, first half-ah vawihnih ngawt goal ban-kham kualin dansakin, second half-ah chu bawk chu tum khat an fuh leh a; minute 25-a Luka Susic-a ball thawnluh pui zet phei kha chu Real keeper Thibaut Courtois khan a thlir hman tawk a, goal kham a fuh hlauh zawk a ni.
Minute 10 a ral leh hnuah Dani Carvajal-a ball chan lai an chhuh a, Sheraldo Becker chuan a ke veilam hmangin goal a zawng leh a, goal bar bawkin a lo dansak leh.
Croatian Susic-a ke veilam atanga chhuak ball pawhin Courtois pel zet mah se goal ban a fuh hlauh bawk.
International break hma lawka inhliam England international Jude Bellingham chuan training zawm leh thei tawh mah se he game-ah hian a la inlan thei lo.
Madrid hi season thara league match vawinga an khelh tawhah la tlawm lo mah se point khatin hmahruaitu Barcelona an la pha lo.
Penalty goal hnih chakpuitu Real
