MUHCS 1.0 a dah let leh turin sawrkar ngen an tum a, hemi bawhzuitu atan hian Working Committee an din.
Mizoram Civil Pensioner Association (MCPA) chuan pensioner-te chu tun sawrkarin health care scheme a duan hmasak – MUHCS 1.0 a hamthatna an dawnte hmantir leh turin ngenna thlen an tum a. Hemi bawhzuina atan hian Inrinni khan Aizawlah an inhmukhawm a, MUHCS 2.0 a pensioner-te dinhmun tih danglam tak chungchang sawiin, MUHCS 1.0 aia dinhmun chhe zawka dah an ni chu hriatthiam har an tih thu san sawi. Hamthatna an dawn ang chu dawn let leh an duh thu an sawi bawk.
Resolution siamin, “MUHCS 2.0 a pensioner-te dinhmun min siamsak dan hi tha tawk lo hle in kan hria a, MUHCS 1.0 min hmantir leh turin sawrkarah ngen nise, kan ti a. MUHCS zawm theihna atan 2026 May thleng hun min hawnsak turin rawh se,” an ti. Sawrkara ngenna an thlen tur a hlawhtlin ngei theihnan a bawhzuitu tur Working Committee a din a, member tur pawh an ruat nghal.
MCPA hruaitute chuan pensioner-ten MUHCS 1.0 an zawm tam lo tih chu an pawm a, chutihrualin sawrkarin a phalsak angin pensioner thenkhat chuan mipui mimirin an zawm theihna, contributory anga zawm ve pawh engemawzat an awm niin an sawi.
MUHCS 1.0 an zawm loh chhan nia pensioner thenkhatin an sawi danin, MUHCS-a inziahluh theih lai khan he scheme zawmtu empanel hospital an la tam tawk loh avangte, pensioner zingah Golden Card hmang thei an awm tho avangte a ni tih an sawi a ni. Finance department lamin pensioner-ten MUHCS sum an hmang nasa nia an sawi chu, kum upa lam an nih tawh avangin inenkawlna a tam loh theih loh thu leh sawrkar tha chuan pensioner-te enkawl chu an inhuam zawk tur nia an ngaih thu an sawi a ni.
Pensioner-ten MUHCS 1.0 hmantir turin ngen
