Assam huamchhunga rel kawng chhiat avanga Mizoram leh Tripura in POL (petrol & diesel) lakluh kawnga harsatna tawh phahnaah rel kawng chu siamthat ni mah se, oil phurlutute an la inban lek mumal theih loh avangin dan pangngai angin petrol a la awlsam rih loa, diesel ah erawh harsatna a awm lem lo.
Tuialhthei lakluh hi a ziaawm hret avangin Pathianni khan Mizofed chuan Treasury Square leh MINECO-a an petrol pump ah an free sale a, POL lak tum mipui an intlar thui hle a, Treasury Square lamah chuan an intlar thui lai berin Assembly House hrul, Aizawl Tennis Court zawn thleng LMV leh two wheeler an ding a ni.
Mizofed enkawltute sawi danin, Treasury Square pump ah hian petrol litre 20000 leh MINECO ah litre 12000 an unload a; Pathianni hian an sem anga, oil awm dan leh tuialhthei phur tanker lo chhoh dan azirin, Thawhtanni lamah free sale chhunzawm tur nge coupon neite chauh tan hralhchhuah leh rih tur tih thutlukna siam theih a nih a rinawm tih an sawi a ni. Aizawla mimal petrol pump thenkhat pawhin Pathianni khan an free sale a, vawiin (Thawhtanni) a free sale theih inbeisei an sawi bawk.
Thudawn danin, diesel chu Silchar bul Monirbond oil depot-ah Pathianni khan a rawn thleng tawh a, petrol thiar turin tanker engemawzat Guwahati lamah an chhukthla a. Thawhtanni zan lamah Vairengte lut chho hman an awm nual a rinawm tih sawi a ni.
Rel kawng chhiat vanga Mizorama petrol & diesel lakluh kawnga harsatna tawh phahnaah rel kawng hi siamthat tawh a ni tih FCS& CA department hotute chuan an sawi a. Rel kawng a that takah chuan dan pangngai angin tluang takin lakluh chhunzawm theih tawh tura ngaih a ni a, mipui chiai lo turin a ngen tih an sawi a ni.
Petrol a ziaawm chho hret
