Petroleum Entrepreneurs’ and Transporters’ Union of Mizoram (PETUM) chuan petrol leh diesel lakluh kawngah oil depot kan neih ve loh avangin Mizoramin harsatna kan tawk hma thin hle tih sawiin, oil depot neih hun an nghakhlel a, sawrkar hmalakna pawh beiseina sang tak nen an thlir tih an sawi.
PETUM chuan, FCS&CA department-in thu hriatna rintlak leh chhuchianna pawh awm hmasa loa petrol pump neitute vaukhanna ni awm tak sawi a, trade license cancel sak hiala hma lak tum thu a sawi chu hriatthiam har an tih thu an sawi a. Tuialhthei lakluhna kawngah harsatna awm mah se, a theih ang angin petrol pump neitute leh a phurtuten mipui mamawh phuhru turin an thawk tih sawiin, hetihlaia thuchhuah dengkhawng tak a awm chu mak an ti tih an sawi.
‘FCS&CA department thuchhuak kalha petrol/ diesel hralh an awm a nih chuan dan hmanga hma lak mai tur ni awm tak a nih laiin, petrol pump neitute laka mipuiin rilru dik lo an put phah theih ang zawnga thuchhuah a awm hi pawi kan ti hle,’ a ti.
PETUM-in oil depot nghakhlel
