PFA men’s player of the year Haaland
Manchester City forward Erling Haaland chu amah ang bawka professional footballer-te’n thiamber atan an thlang a, PFA men’s player of the year award dawngin, Arsenal winger Bukayo Saka chu young player of the year atan thlan a ni ve bawk.
Pep Guardiola team tana a debut season-ah Norway forward Haaland chuan inelna hrang hrangah goal 52 tehreng thun tlingin, City chu Premier League, FA Cup leh Champions League title lakpuiin Treble champion a nihpui.
Kum 23 mi Haaland hian he chawimawina ngaihhlut hlawh dawng ve tura chhawpchhuah dang a team-mate pahnih Kevin de Bruyne leh John Stones, Arsenal star Saka leh Martin Odegaard bakah Bayern Munich lama kal ta Tottenham star Harry Kane-te a hmakhalh a; young player prize dawng thei tura nominee zingah pawh tel bawk mah se he award hi chu Gunners tana goal 14 thuna assist vawi 11 siamchhuaktu England winger Saka an hlan ta zawk a ni.
A chawimawina dawn chungchang sawiin Haaland chuan, “He award hlu tak dawn hi ka tan chawimawina a ni a, mahni elpuite ngei atanga pawmpuina dawn chu a ropui veng veng a, vote min petute zawng zawng chungah lawmthu ka sawi e.
“Kei leh team tan season liamta kha hriatreng hlawh tawh tur niin, Treble em kha chu ka suangtuah pha lo a, hriatreng hlawh tur season liamta ang kha kumin hian thlen nawntir leh kan duh a, chumi tur chuan bul kan tan tha leh tawh a, hetiang taka kan kal zel hi a ngai chho dawn a ni,” a ti.
June 2022 khan City chuan Haaland hi Borussia Dortmund atangin pound maktaduai 51.2-in an leichhuak a, tunlai football khawvela player lei fuh berte zinga mi a ni awm e.
Young player prize lam thlir zui ila, chawimawina dawngtu kum 21 mi Saka bakah khan Brighton atanga Chelsea zawm thar Moises Caicedo, Aston Villa midfielder Jacob Ram-sey, Arsenal forward Gabriel Marti-nelli leh Brighton striker Evan Ferguson-te chu nominee dang niin, men’s leh young player award dawngtute hi PFA Team of the Year 2022-23 zingah telh nghal an ni.
Aston Villa striker Rachel Daly chuan PFA women’s player of the year award dawng ve thungin, Chelsea player Lauren James kutah hmeichhe lam young player of the year award a lut ve bawk.
Championship thununtu Burnley
Top flight ang bawkin English football inkhaidiat thlak dana a hnuai lamte pawhin award hi an sem ve bawk a, PFA Championship team of the year thlanna lamah champion Burnley chuan player pali ngawt an thawh a; season liamtaa Middlesbrough lama khawsa forward Chuba Akpom chu second-tier’s player of the year atan thlan a ni.
August thla tir lama Boro chhuah-sana Ajax lam pan ta Akpom man hi pound maktaduai 14.3 la tling chho tur niin, season liamta khan inelna hrang hrangah English club tan khan goal 29 thun tlingin, league top scorer a ni nghe nghe.
Intihsiak tinreng belhkhawma goal 29 puitlina Championship kawtkaia Ipswich Town hlangkaitu Conor Chaplin chu League One player of the year atan thlan a ni ve thung.
Bradford City player Andy Cook chuan League Two player of the year prize dawngin, Cook hian season liamta khan goal 31 thun tlingin, chu’ng zinga 28 chu league a ni a, Bantams uairittu ber a ni.
PFA Team of the Year 2022-23: Aaron Ramsdale (Arsenal), William Saliba (Arsenal), Ruben Dias (Man City), John Stones (Man City), Kieran Trippier (Newcastle), Rodri (Man City), Martin Odegaard (Arsenal), Kevin de Bruyne (Man City), Bukayo Saka (Arsenal), Harry Kane (Tottenham Hotspurs), Erling Haaland (Manchester City).
PFA Championship team of the year: Arijanet Muric (Burnley), Ian Maatsen (Burnley), Connor Roberts (Burnley), Anel Ahmedhodzic (Sheffield United), Tom Lockyer (Luton), Nathan Tella (Burnley), Josh Brownhill (Burnley), Iliman Ndiaye (Sheffield United), Chuba Akpom (Middlesbrough), Viktor Gyokeres (Co-ventry), Carlton Morris (Luton).
PFA League One team of the year: James Trafford (Bolton), Mads Andersen (Barnsley), Ricardo Santos (Bolton), Bali Mumba (Plymouth), Leif Davis (Ipswich), Luca Connell (Barnsley), Sam Morsy (Ipswich), Barry Bannan (Sheffield Wednesday), Conor Chaplin (Ipswich), Jonson Clarke-Harris (Peterborough), David McGoldrick (Derby).
PFA League Two team of the year: Lawrence Vigouroux (Leyton Orient), Ibou Touray (Salford), Junior Tchamadeu (Colchester), Omar Beckles (Leyton Orient), Carl Piergianni (Stevenage), Elliot Watt (Salford), Owen Moxon (Carlisle), Idris el Mizouni (Leyton Orient), Sam Hoskins (Northampton), Andy Cook (Bradford), Paul Smyth (Leyton Orient).