Mizoramin phai lam atanga sangha a lakluh thin thenkhatah a vawnthatna atana hman formalin sulhnu a awm a, mihring tan erawh pawi tham loa ngaih a ni tih Fisheries director Laltleipuii chuan a sawi.
Mizoramin sangha a ei tam ber hi Andra Pradesh atanga lo chho a ni a, Mizoram lo thlenna turin karhnih – karthum a rawn thang a, a rawn thlen chuan a chakna a hloh nasa tawh thin tih Fisheries director hian a sawi a. State pawn atanga sangha lakluh zingah sangha vawnthatna turin Aizawl hmun thenkhatah formalin sulhnu hmuh a ni a, amaherawhchu, mihring tana pawitham a ni lo tih a sawi.
Danin a phal loha sangha man social media lama lang chu an umzui nghal zel tih a sawi a. Tunhnaia social media lama lang, Mizoram chhimlam hmun pakhata bomb engemawzat hmanga sangha man pawh chhui zui mek a ni tih a sawi a ni.
Mizoram Fisheries Act hman mekah kan ram luidung awmze nei leh hlawk zawka hman tangkai a, luidunga sangha an rem loh nana venhim chu a tum a ni, tiin, “A rem loh nan a fuan hun laia venhim, an chereu loh nana man phal lohna leh dan hnuaia man phalna hmun siam, mipui zirtir leh dan phal loha sangha man ching man chhuah leh tul anga dan anga hrem a huam a ni,” Laltleipuii hian a ti.
E Mizoramah sangha dil hectare 5759 siam a ni tawh a, kum khat chhungin sangha tharchhuah quintal 50298.50 anga chhut a ni. Sangha dil nei mi 18519 awm anga chhut a ni bawk.
E Mi pakhatin kum khat chhungin sangha kg.11 vel ei anga chhut a nih laiin, zaa 38 vel chauh tualchhungah thar chhuah a ni a, state pawn atangin mamawh dang hi lakluh a ni.
E Sangha thar chhuah tamna Mamit leh Kolasib district-a sangha khawitute chuan an dil hmunah hnamdang an khar tir thin avangin Mizoram tharchhuah tam tak hi state thenawmah a chhuak ve bawk.
E Department hmalakna in sangha dil siam dan dik tak atanga sangha khawi dan, sangha chi thar chhuah leh enkawl dan mumal sangha khawitute an zir theihna turin NEC atangin cheng vaibelchhe 20 DPR thehluh a ni a, hei hi pawm a ni, a ti.
E Kum hmasa lama kalpui tawh, partial harvesting emaw Angling hmang emaw in sangha man runpui kalpui tum a ni a. A humhalhtu khawtlangte pawh hmin chhoh zel beisei niin, sawrkar tan sum tam zawk hmuhchhuah theih beisei a ni.
E Sawrkar kumtharah Fisheries department inrelbawlna atan cheng nuai 1101.43 dah ni a. Kumhlui aia a tamna chu cheng nuai 45.91 a ni a, a bang zawng hi department hmasawnna hnathawhna tur a ni. Department hmalakna ni central sponsored scheme-a innghat a ni.
E Fisheries department hnuaiah thawktu 178 awm turah 99 an awm mek a, post ruak 79 a awm.
Phai sangha thenkhatah formalin sulhnu a awm – Fisheries director
