Phaisen leh Saipum kawng siamtha dawn
N. Hlimen leh Saipum inkar kawng chhuat siam tum leh Buhchang leh Phaisen inkar kawng chhuat tlahniam siamthat chu chak leh tluang taka siam a nih theihnan Kolasib District SP chuan dan tlawhchhan hmangin heng kawng paltlang tum lirthei tan thupek a siam.
N. Hlimen leh Saipum inkar kawng hi PCC (plain cement concrete) hmanga siam a ni dawn a, kawng a tlo zawknan leh hna chak taka thawh a nih theihnan November 27 zing dar 6.00 atanga December 19 thleng helai kawng hi khar tur a ni a, hemi hun chhung hian lirthei eng chi mah kal phal a ni lo tih SP hian a sawi.
He thupek zawm lo chu 177 & 179 MV Act hmanga hrem an ni dawn tih a sawi a. He thupek hian tul bik thila Police, Fire & Emergency Services, ambulance leh magistrate-te chetvelna erawh a huam lo.
Buhchang leh Phaisen inkar kawng (km.1.25) ah kawng chhuat tlahniam siamthat mek a ni a, November 21-26 chhung hian hna chak zawk a thawh a nih theihnan leh hnathawktute an him theih zawkna atan medium vehicle chin chunglam tan rit phura zawh khap a ni. Thupek zawm lo chu 177 MV Act hmanga hrem an ni dawn tih a sawi a ni.
Phaisen leh Saipum kawng siamtha dawn
