Rohtak, Haryana-a All India Inter-University Games kal mekah Govt. Hrangbana College-a first semester zirlai Joseph Lalrinzuala chuan Karate Discipline Kumite -75 kg huangah bronze medal a hlawhchhuak a, Khelo India khel turin a qualified nghal a ni.
Mizoram University hian All India-Inter University Games khel tur hian Karate discipline atangin mi pahnih leh coach pakhat tirin; Govt. Hrangbana College-a first semester zirlai tho K. Lalruatfela chuan medal hlawhchhuak zo lovin quarter final-ah a khingpui hi point tlemtea hneh loin vanduai zawkah a tang a ni.
All India-Inter University Games Karate discipline khel thei tur hian qualifying round hautak zet paltlang hmasak a ngai a; Mizoram atangin mi paliten qualifying round hi zuk khelin, an zinga mi pahnih an qualify tawk a ni.
Mizoram University bultuma University Games zuk khelte hi coach Sensei Lalramthara’n hruaiin, tun, January ni 19 hian Aizawl an rawn thlen beisei a ni.
All Mizoram Karate Association chuan Mizoram University hotute chungah lawmthu sawiin, an naute’n hlawhtlinna an chan hi lawmawm an tih takzet thu an sawi a, hmabak nei an nih avangin hlawhtlinna chang Joseph Lalrinzuala pawh chawl loa ngawrh taka practice chhunzawm turin an fuih bawk.
Phaituala Karate bronze dawngtu Lalrinzuala
