Rev Dr Ramengliana
Hun rei tak mihring kan khawsak tawh hnu, 3000 – 2500 BC, velah pawisa hi an hmang tan ve chauh a. A tel lo pawhin a awm theih viau ni ngei tur a ni. Chutih laiin thil hmuh chhuah tawhah chuan thil tangkai ber pawl a ni a tih loh theih loh a. Tunlai khawvelah phei chuan a lovin a awm theih loh a ni ber. A thiltihtheihna a san em avang hian Hmelmapa pawhin a duh zawng tihhlawhtlin nan a hmang nasa tih kan hria. Thlarau nunah phei chuan kan fimkhurpui tur ber pakhat a nihzia kan hre theuh awm e. Lal Isua zirtirnaah khan sum leh pai hian hmun a chang lian hle niin an sawi hial a. Pathian thiltihtheihna leh amah kan rinna chotu lian ber pakhat a tling awm e.
Pathian rawngbawl nana tangkai tawp a ni
Khawvel thil ang deuhvin lang mah se pawisa hi Pathian rawngbawlna hmanrua atan hlei hlei hian a tangkai a. Kohhran pawhin ‘Financial Campaign’ hial a nei thin a nih hi. Thlarau bo kan hmangaihna kengtu, Pathian tana kan inpekna tilangtu, Pathian ram zau zelna kan vei leh kan vei loh hriltu, Pathian rawngbawlnaa kan tel ve tiawlsamtu a ni chiang mai. Heti a nih avang hian thawhlawma duh thawh viau mai hi Pathian hmangaihtu tan chuan thil awm tak a ni a. |hahnemngaih avanga pal sual lek lek pawh a awm thei tih erawh chu hriat a tha.
Thlarau thila tangkai tak ni mahse tisa taka hman sual theih a nih avang hian sum enkawl chungchangah Kohhran hi a fimkhur a ngai nasa hle a. Fel taka kan vawn a, fel takin kan vawng a ni tih thawhlawm thawhtute pawhin an hriat a ngai a ni. Kohhran a chak leh chak loh hi kan sum enkawl danin a hril ve miau avangin lak zam mai mai chi a ni lo. Miin Kohhran sum vawngtute an rin tawh loh chuan Kohhran tha a zuai tan tihna a ni thei dawn a ni. Vawiin thlenga Mizo kohhran chak chhan, Pathian tana pe duhtuten ngaihngam taka an pek mai thin chhan chu enkawl kawngah an la rin zawh vang a ni.
A hman danah fimkhur a ngai hle
|henkhat chuan tluangtlam takin, “Pathian tana kan pek tur chu pek mai tur, kan mawhphurhna kan hlen a ngai. A hmangtuten an lo hman danah kan buai vak a ngai lo. Pathian nena an inkar a ni,” an ti thin a. He ngaihdan hi tha awm ang taka lang mah se tha ziktluak lem lo a ni a. Pathian tana petu chuan a thilpek Pathian ram zau nan fel taka hman a ni em, tih chu a chhut thiang awm e. Chhut thin pawh a hrisel tho. Amaherawhchu, ringhlel leh a dik lohna hmuh tum pheta chhut ni lo ila. A vawngtu leh a hmangtute an fimkhur theih nan Pathian hmangaihnaa tih ni se.
Sum hi a hmuhna leh a hmanna a awm a. Mi tam zawk chuan sum hmuhna tling lo leh fel lo hi kan vei ber a ni a. Mi puitling chuan a hmanna dik an ngai pawimawh tel thin a ni. Kohhranah te hian miin thawhlawm an rawn keng khawm a, a dawngtu leh a chalaituten fimkhur tak leh a hmanna awm ber bera kan hman a pawimawh hle mai. Pathian ram zau nana dik tak leh hlawk taka hman a ni tih an hriat chuan miin thawh nuam an ti thin. Chuti ni lova, khawih chingpen em ni lo mah se hmanna awm tak ni lo leh tangkaina tam lova chalai a ni tih an hriat vaih chuan thuanawpna hna a tling thei a ni. Petu chuan pek a manhla tih a hriat khawpin hman chhuah lama mawhphurtute hian uluk a ngai.
Sawma pakhat Pathian ta(?)
Tunlai social media-a sap thu sawitu chi hrang hrang hian sawma pakhat selna a awm leh thin. Kan zinga mi thenkhatin an thu leh hla hi chaw lutin Thuthlung Thar zirtirnaa a tul tawh lohzia te pawh an thehdarh ve fo a nih hi. Billy Grahama meuh pawhin a sawi, tiin video te ka lo dawng ve a. Ani hi chuan chhandam nihna turin a tul lohzia a sawi lek a lo ni zawk si. Kan thinlung kan enfiah fo a pawimawh reng dawn. Kan neih thil Pathian ram zau nana pek tlem theih dan kawng theology kan zawng a nih chuan malsawmna vurtu tan a dawnsawn a nuam awm lo mang e. Pathian ram hnaah hian ‘Eng nge ka tih theih ve ang? Eng nge ka tih tur chin?’ tih hi nge, ‘Eng nge ka tih loh theih? Eng nge ka la pawm tel theih? Eng hi nge chan lova ka awm theih?’ tih kan inzawh thin tih hian thil tam tak a hril awm e. Kan sum hi keimahnia tel a ni a, keimahnia tel eng zah hi nge Pathian tan kan pek phal tih hi a awmzia chu a ni mai e.
Pathian ram tana thilpek kan sawi hian thenkhat tan chuan Sawma Pakhat chauh pek hi a tawk lo mai thei tih hi kan ngaihtuah ve tawh thin em? Sum leh pai dinhmun tha, Pathianin sum leh pai tam taka a vur tan hi chuan an neih atanga tehin 1/10 te chu a tlem mah mah mai thei. El-Bethel Speaker-in a sawi anga ina la awm atang zela teh a nih phei chuan kan pe tam lutuk mawh khawp ang mawle. Thuthlung Hluia Israelte Pathianin a phut dan takah chuan 20-30/100 niin chhuttuten an sawi. Eng pawh ni se, Pathian ram zau nana pe tur kan ni a, kan pek dan tur awm hi chuan kan pe mawh khawp mai tih hi kan thutlukna ni se. Kan nih leh kan neih pumpui phuttu tan hi chuan sawma pakhat mai maite chu ama tana kan thilpek mawngphah ni chauh awm a ni e.
Phal tak leh him takin
Ringtu dik tak chuan Kohhran a chak a duh thin a. Kohhran chak nan sum a tangkai hle. A thawhtute kan pawimawh angin a enkawltute kan pawimawh ve tho. Him taka vawn a pawimawh em em rualin dik taka hman a tul bawk a. Pathian Ram zau nana thil tangkai, kan hmanna awm tak kan hriat thiam a ngai a. ‘Inkhawmpuiin a pawm, committee-in a rel’ tih vanga ngaih tha mai lovin inkhawmpui leh committee ten uluk taka rel a tul a ni. A reltu chan kan chan hian kan duh ang angin kan ti thei tih a kawk lo va, Pathian duh dan zawngtu tur kan ni tih hriat a tha.
Thawktute lawmman awm tawk tak (tam uchuak lo, zahpuiawm khawpa tlem lo) pek theih te, Kohhranin kan mamawh awm tak building neih te (a ropui zawnga inel loh), ramthar hmalakna tawk fang (tlin loh leh phak loh thleng thleng inphut loh thiam), rethei leh harsate tana luan chhuahna kawng (kan zinga tanpui ngaite ngaihthah loh) leh Kohhran mipui chanvo, kan pek leh tih tur awm tak ti tur hian Pathian atanga finna kan mamawh thin a ni. Hei hi kan bawhpelh palh ang a, Engkim neitupa duh dan hi kan pha lovang tih a hlauhawm khawp mai.