23 Sector Assam Rifles huaihawta college hrang hranga adventure club member thlanchhuah mi 30 telna Phawngpui Expedition a Phawngpui Tlang lawnchhuakte chu Thawhlehni khan larsap Hari Babu Kambhampati chuan Raj Bhavan-ah a lo lawm a. Heng thalai – – hmeichhia 14, mipa 16 leh anmahni hruaitu Assam Rifles officer leh sipai te nen an inkawm.
Phawngpui Expedition-a telte leh an hruaitute chu an thil tum hlawhtling taka an hlen theih avangin lawmawm a tih thu a hrilh a. He expedition hian thalaite leh Mizoram mipui bengah tourism leh adventure tourism huanga Mizoramin theihna sang tak a neih chungchang te ring takin sawi se a duh thu a sawi a. Ruihlo do kawngah Assam Rifles hmalakna pawh fakin, tun expedition a tel thalai te chu Mizo thalai zinga te nun dan hrisel inkawhmuh kawnga hmahruaitu ni turin a chah bawk a ni.
March 10 khan Phawngpui Expedition tia hming vuah hi chief secretary Dr Renu Sharma chuan a vailiam a, March 12 khan Phawngpui Tlang chhip an lawn chhuak a ni. Expedition hi G-20 huanga Assam Rifles-in program a buatsaih zinga pakhat a ni a. Adventure sports, responsible tourism, Mizoram vawnfai leh environment humhalh, ruihhlo laka thalaite tih fihlim, Mizorama tlang mawi tak takte dimdawi tak a, a ramhmul tichhe lo leh a hmunhma tibawlhhlawh lo zawnga tlawh intihhmuh inzirtirna atana huaihawt a ni.
Phawngpui tlanga lawnte lawmpui
![](https://theaizawlpost.org/wp-content/uploads/2023/03/phong.jpg)