PHC pahnihin damdawi in
tha tehna an paltlang ve leh
India rama sawrkar damdawi in tha bik tehnaah Mizoram sawrkar hnuaia primary health centre (PHC) pahnih an tling thar leh a, heti hian Mizorama HWC/ PHC 57 target awm zinga 36-in NQAS national certificate an nei tawh.
National Health Mission Mizoram mission director Dr Lily Chhakchhuak sawi danin, India rama sawrkar damdawi in tha bik tehna, National Quality Assurance Standards (NQAS) a tling thar Sialsuk PHC-in 90.06% leh Suangpuilawn PHC-in 93.14% an hmu.
Heti hian Mizorama sawrkar damdawi in 49 chu NQAS national certificate nei tawh an ni a. Tunah hian sawrkar damdawi in 18 leh H & Wellness Centre Sub-Centre 21-in state level certificate nei mekin national certificate result nghak mek PHC 3 an awm a ni.
NQAS certified damdawi in hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn atangin endiktu an lo kal thin a. Hetah hian 70% chunglam an hmuh chuan certified an ni chauh thin.
Certified tawh damdawi inah hian natna darh thei ven kawngah, thawktu zawng zawng an hna bil an thiamna, an level zelah enkawlna an pek that dan, a thlawna enkawlna leh damdawi pek, damdawi in faina leh dik taka damdawi in bawlhhlawh sawngbawl, hawihawmna leh a chhehvel vawnfai kawngah, environment vawnthat kawnga hma an lak dan endik a ni.
Health & Family Welfare minister Lalrinpuii chuan India rama damdawi in tha tehnaa tling thei tura thawktu Sialsuk PHC medical officer Dr C Lalhmangaiha leh Suangpuilawn PHC medical officer Dr Lalrinsangi leh an thawhpuite thawhrimna fakawm a tih thu a sawi a. NQAS certified sawrkar damdawi in 49 kan neih tak chu mipuiin tangkai taka an hman a duhsak tih a sawi a ni.
PHC pahnihin damdawi in tha tehna an paltlang ve leh
