Thla hnih dawn Aizawl khawpui chawmtu tui lakna pump chhiat avanga tuia harsatna awm chu PHE minister leh ZPM sawrkarin an ngaihsak tawk lo tih Congress Thalai chuan an sawi.
Kumin May 28-a Cyclone Remal avanga Aizawl khawpui chawmtu Tlawng lui Water Supply Scheme Phase I & II pump harsatna awm chu Congress Thalai Hqrs. hruaituten Thawhlehni khan a hmunah an tlawh a. PHE department-in theihtawpa tui harsatna sukiang tura chhun zan zawma hna an thawk chu fakawm an tih thu an sawi.
Congress Thalai president Laltawnliana chuan, tuna tui pump chungchanga harsatna nia lang Vertical Turbine Pump tha lo leh a thar thlakna tur ngaihven a la ni lo chu PHE minister leh ZPM sawrkarin a ngaihsak tawk loh vang a ni, tiin, tui pump-na atana hmanraw chhia bakah hmanraw pawimawh bo awmte chu pawi a tiin a ranglama an harsatna ngaihtuah sak turin sawrkar a ngen tih a sawi.
Aizawl khawpui tui harsat avangin thenawm khawveng leh thawktute inkarah inhmuhmawhna a thleng nia sawi a awm thu sawiin, VIP leh official bik awm loin chhungkaw tinin an mamawh ang tui rualkhai taka sem a tul tih a sawi a. Sum leh pai lama buai lo zawk sawrkar hotute leh official-te pawhin mi harsa zawkte dinhmun hre reng turin an ngen tih a sawi bawk.
“PHE minister leh ZPM sawrkar hi, nachhawkna ei ang maia party office vela insawi hlim chawpa hun khawhral lo hian, mipui harsatna sukiang tura che chhuak zawk turin ka ngen a ni,” Laltawnliana hian a ti.
PHE thawktute sawi danin, a tlangpuiin darkar 14-15 vel tui an pump thei a. Tlawng lui tui hi a nut nasat thin avangin in tlaka ti thianghlim turin thawktute an hah hle tih sawi a ni.
PHE minister-in tui harsatna a ngaihsak tawk lo – MPYCC
