Pathianni zing khan southern Philippines-a Catholic Mass neih laia bomb puak avangin mi paliin nunna an chan.
He thil thlenna hmun hi Philippines-a Muslim city lian ber Marawi a Mindanao State University gymnasium-ah a ni.
Mi sawm li pahnihin hliam tenau an tuar bawk tiin thuneitute chuan an sawi.
Kum 2017 khan Marawi hi sorkar leh Islamic State group nena inzawmna nei militants te nen thla nga chhung ngawt an inbeih tawhna a ni bawk.
Daulah Islamiyah-Maute Group te chu bomb tipuaktu an ni thei tiin Brig Gen Allan Nobleza, police commander chuan a sawi a.
Gen Nobleza chuan kar kalta Zirtawpni khan Amry te nena Datu Hoffer Ampatuan khuaa inbeihnaah islamist group member 11 an tih a, tun Pathianni a bomb tihpuah pawh hi an phuba lakna a ni thei tiin a sawi.
President Ferdinand Marcos chuan bomb tihpuah chu na taka a dem thu sawiin foreign terrorist te inhnamhnawihna tiin a sawi bawk a. Mipuite hnena thuchah a sawiah thiltisualtute chu hrem ngei a tiam bawk.
Thil puak hi grenade emaw improvised bomb ni ngeia ngaih a ni a, chhuichianna kalpui mek a ni a. Bomb na lutuk a ni lo thung a, gymnasium chhuat a puahna floor bak chu building pawhin hmelhemna dang a nei meuh lo bawk.
Pathianni kha Catholic Church tena Christmas hma kar li Advent intan hun a nih avangin inkhawm pawh hun dang aiin mi an tam lai a ni a.
Philippines ah hian a mipui 113 million vela 80% dawn chu Catholic an ni a, Sunday Mass hmann atan school gymnasium hman mai te hi tih thin dan pangngai niin shopping mall-ah te pawh a remchan dan angin hman mai thin a ni.
Mindanao hi Muslim minority te tamna hmun niin helna leh tharumthawhna thlen nasatna ber a ni bawk.
Kum 2012 khan Manila leh Muslim rebel group lian ber te chuan Mindanao ah autonomous region din an remti a, kum 2022 khan regional assembly inthlan hmasak ber pawh neih a ni a. Mahse, khami hnu atang khan tharumthawhna a chhuak mathlawn lo a ni.
Philippines sorkarin Muslim rebel group te nena inremna a siampui kha President Benigno Aquino hun lai a ni a.
Moro Islamic Liberation Front (MILF) te nena inremna siam a nih hmain kum 40 vel zet hel tawh niin buaina avanga nunna chan mi 120,000 chuang an tling hmana ngaih a ni bawk.
Mindanao hi Philippines a hmun him lo ber pawl niin buaina awm rengna a nih avangin hmasawnna pawh a hnufum zual bik a. Inremna siama buaina reh tura beisei chuan rah tha a chhuah tak tak theih chuan loh avangin firfiak awm te pawh an che rawva tial tial bawk tia sawi a ni.
Philippines-ah inkhawm laiin bomb puakah mi pali thi
