Philippines President Marcos-a’n India tlawh dawn

Philippines President Marcos-a’n India tlawh dawn
Philippines President Ferdinand Marcos Jr chuan karleh hian eibar leh venhimna thila India kawm turin a zi dawn a, hetih lai hian ram pahnih lawng sipaiten a vawi khat nan South China Sea-ah nunchan an zir dawn bawk.
Bongbong tia an sawi thin bawk, Marcos-a hi kum 2022-a president a nih hnua India a zinna hmasa ber tur niin August 4-8 chhung a cham dawn a ni.
August 3 atangin India leh Philippines lawng sipaite chuan Manila leh Beijing te tuipuia an intihbuaina ni reng, Scarborough Shoal bulah nunchan an zir tan bawk ang.
Prime Minister Narendra Modi-a nen an inkawm dawn bakah Marcos-a hian August 6-a think tank-in a huaihawt hun hmannaah Philippines leh India inkar a sawi ang.
Marcos-a’n India a tlawh tur hi ram pahnihte, a bikin ram venhimna leh tuipui himnaa an thawhhona thatzia tihlanna a ni dawn tih Indian sorkar mi pawimawh pakhat chuan a sawi a. South China Sea-a boruak a san mek laiin New Delhi leh Manila chuan tanghovin a him theih nan sipaia hmalakna huang an zauhna tur ni bawkin a sawi.
Ni hnih awh tur nunchan zirnaah hian India chuan indo lawng pathum a thawh chhuahpui dawn a, guided missile destroyer leh anti-submarine warfare vessel paw a tel dawn a. Indian indo lawngte hian nunchan zir hmain lawngchawlhna an tlawh ang a, Philippines hian China-in thliarkar tam tak an taa a chhal tuipuiah hian indo lawng pahnih a thawh chhuahpui ve thung ang.
Tun hnaiah China hian lawng sipai leh Coast Guard lawng eng emaw zat Philippines indo lawngten Scarborough Shoal chhehvela patrol an neih tur um kir nan a tir chhuak thin a. Philippines leh an thawhpui ramten South China Sea-a nunchan an zir thin pawh a sawisel thin bawk.
India hian tlang takin South China Sea-a tuipui inchuhnaah hian Philippines lam a tan thu a sawi tawh thin.
Philippines hi Indian venhimna hmanraw siam leisaktu langsar tak a ni bawk a. Kum 2023 khan India leh Russia tangho siam BrahMos cruise missile dawngtu hmasa ber niin Filipino thuneitute chuan April thlaah hian Manila hian a thawh hnihna a dawng leh dawn niin an sawi bawk.
India hian Philippines leh Asean member dangte chu kum 1992-a Look East policy a kalpui atangin a kawmngeih tan a. Tunah chuan Act East policy tia a kalpui mek leh Indo-Pacific-a luh thuk a tumnaa a thawhpui tha a ni mek bawk.
Modi-a leh Marcos hi October, 2024 khan Laos-a Asean-India Summit-ah khan reilo te an inkawm tawh a. Ram pahnihte hi inbiak fo ni se an ti a, sumdawnnaa an inpawhna chu a pawimawh ber zinga mi niin 2023-24 chhunga an inkara sum che chu $ tluklehdingawn 3.5 hu a tling.
Philippines-ah hian IT, healthcare & pharmaceutical, textile, in sak leh chemical lam siamtu Indian company tam tak an inbun a. India hi an rama pharmaceutical thawn luttu tam ber niin 2020-21 chhung khan $ tluklehdingawn 290 man thawnin 2024-25 chhungin $ maktaduai 460 man a thawn bawk.