Phir-li thlakim lo a piang ten record siam

Phir-li thlakim lo a piang ten record siam
Kum khat an tling ta a, Lainey, Kali, Lennon leh Koen Bryant te chu Guinness World Records-in phir pali piang, dam chhuak zinga thla kim lo nasa berah a puang.
Becca leh Lavareis Bryant te chuan phir pali, mipa pahnih leh hmeichhia pahnih an nei a, an fate hi May 2024 khan University of Alabama Birmingham Hospital-ah an nei a, an fate hi an pian hun hma ni 115-ah an piang. Becca hian a fa phir pali te hi kar 23 leh ni 4 chiah a pai hman a, nuin nau an pai puitlin (full-term pregnancy) chu a tlangpuiin kar 39 atanga 40 te a ni.
Kar 23 leh ni li chiah nu pum chhunga an awm avangin an pian hian dam khawchhuah theihna chance pawh an nei chhe hle a, mithiamte chuan an dam khawchhuah theihna chance hi 10% chiah niin an chhut a, mahse, heng nausen pali hi an dam kim vek a, tunah chuan kum an tling ta a ni. Guinness World Records hian hetiang naupiang dam chhuak record siam nan hian kum an tlin thleng an nghak phawt thin a ni.
Phir pali zingah pawh Lainey a tê bera, a pian hlimah pound 1.4 (gram 630 vel) lek rit a ni a, Lennon chu a lian ber niin, pound 1.7 (gram 770 vel) a rit a ni ve thung. An vai hian neonatal intensive care unit (NICU)-ah thla ruk chhung enkawl zui an ni.
Naupiang dam chhuak zinga thla kim lo nasa ber record chu kum 2020-a kar 21 leka piang Curtis Means niin, ani pawh hi University of Alabama Birmingam a piang tho a ni a, tuna Bryant unau te record hi chu phir pali (quadrulet) piang zinga thla kim lo nasa ber a ni ve thung.
Becca Bryant hi University of Alabama Birmingam-ah hian damdawi inah bed rest a ni a, damdawi ina a awm laiin a tui bawm a keh ta a, a hnu lawkah infection a nei zui a. Becca chuan, “Ka chau rang khawp mai. Tichuan a ka hriat leh cuan inzaina dawhkanah ka lo awm tawh. Hmanhmawh takin min lo zai rum rum a ni,” a ti.
Nau chhartute zinga mi Dr. Colm Travers, neonatologist chuan, “A buaipuitu pawh kan tam, nau neihna room-ah khan mi 30 vel zet kan awm ang, medical staff te pawh kan inpel suau suau a ni ber mai,” a ti.
Becca hian a fate hi a hmu thei bik lawk lo va, NICU-ah enkawl nghal vek an nih bakah amah pawh zai tawk a ni a, ni 45 hnuah a fate hi a pawm ve thei chauh a, damdawi ina thla ruk pumhlum tawp an awm hnuah mahni in lamah an inhruai haw thei ta a ni.
Lavaries Bryant hi police officer niin, Becca Bryant hi ICU nurse a ni a, fa pathum, Kendall, kum 12, Laikyn, kum 7, leh Kainen, kum 3, an nei tawh sa bawk a, an phir pali neih belh nen fa pasarih neiin, chhangchhe takin an awm ta a ni.
Tunah chuan phir pali te pawhin kum an tling ta a, an pian hlima tê ber Lainey chu a la zâng ber tho a, kum a tlin hian pound 14 (kg 6.350g) niin, an pian hlima lian ber Lennon chu a rit ber a la ni ta zel a, pound 17 (kg 7.700g) a rit a ni ve thung.