Site icon The Aizawl Post

Pianphunga harsatna neite pui tur Mobile Court hawng dawn

Chief commissioner for Persons with Disabilities (CCPwD) leh State commissioner for PwD (SCPwD) office tangdun buatsaih ni hnih awh tur Joint Mobile Court leh hemi atana official-te training chu Nilaini atang khan Aizawlah tan a ni.
Joint Mobile Court hi vawiin – November 19 hian neih a ni dawn a, hemi chhung hian rualbanlohna leh a kaihhnawih complaint emaw harsatna nei chuan Zo Hall Tourist Lodge Chaltlang-ah complaint form ziakin a thehluh theih a. Heng complainte hi a hmunah chief commissioner for PwD leh state commissioner for PwD hian an chinfel sak dawn a ni.
A hawnnaah chief commissioner S Govindaraj chuan, Mizoramah a hmasa ber atan rualbanlote puala Joint Mobile Court buatsaih a ni tur chu lawmawm a tih thu a sawi a. A hlawhtlin theihna atana state commissioner for PwD leh a kaihhnawih department tanrualna fakawm tiin, rualbanlote harsatna ngaihthlak sak leh an harsatna sutkian pui tura tan lak chu ram hmasawnna kawnga pawimawh tak a ni tih a sawi.
Training-ah hian resource person-ah National Mental Health Programme state nodal officer Dr Robert L Khawlhring leh advocate Lalfamkimi hman an ni a. RPwD Act 2016 chungchang leh Joint Mobile Court kalpui dan tur hrilh an ni. Joint Mobile Court neihna hmunah hian Aadhaar siamthat ngai tan a siamtute an thut dawn bakah rualbanlote mamawh hmanrua dah tum a ni a. UDID la nei lo emaw inziaklut thar duh pui turin doctor an thu anga, mamawh nei rualbanlo tan pan theih a ni ang.

Exit mobile version