Planking tirei thei record siam
Abdominal plank an ti a, core exercise hahthlak zet mai a ni, an ke pahnih mar taka thluangin an bawk a, an kiuah ban tithlepin an bawk a, mawng ti kan vû emaw, tihniam vak emaw loh tur a ni. Hetiang position hian engtianga rei nge i awm theih lo in-chhin ve teh. Mi tam zawk hi chuan minute khat pawh kan thei kher lo vang, mahse, Josef Salek, Czech Republic a cheng chuan hetiang abdominal plant hi darkar 9, minute 38 leh second 47 chhung a ti thei a, Guinness World Record, plank ti rei thei ber a ni. A hmaa hetiang record chu Australian Daniel Scali siam a ni a, ani hian nikum khan record hi siamin, darkar 9, minute 30 leh second khat a ti thei a, he record hi Josef Salek hian a rawn khum ta a ni.
Josef hi therapisr, lecturer leh personal development coach niin, Joska tiin an ko mai thin a, May ni 20 khan AVATAR festival, Park Hotel, Pilsen, Czech Republic-ah record hi a siam a ni.
Joska chanchin hi a ngaihnawm ve riau a, a sawi dan chuan kum 5 kalta kha chuan pa thau sa tha nelh nawlh tak niin, kg 15-in a overweight a, zu leh cigarette ti nasa ve tak a ni thin. Mahse, a nun a inthlak danglam ta a, “Nun thlak thleng tur hian upat lutuk a awm chuang lo, nun hlimawm leh hrisel zawk nei turin eng kumah pawh kan inthlak thei a ni,” a ti.
Hetianga a inthlak danglam takna chhan pakhat chu, kum li liamta khan Sri Lanka-ah a zin a tum a, mahse, UAE-ah passport control lamin a nihna an hai avangin an man a, a thla tel teh meuh jail-ah a tang ta a, a jail tan lai chuan inkhelh leh exercise lam a tuipui tan ta a ni.
Joska chuan, “Vawiinah chuan pa hlim tak ka ni. Kha ka thil tawn avang khan ka lawm zawk, a chhan chu vawiinah hian midang te cho phur thei turin ka awm phah ta a, kan taksain a zawh tawk ni a kan hriat aia nasa zawkin thil kan ti thei tih ka entir thei hi ka lawm a ni,” a ti.
Planking tirei thei record siam
![](https://theaizawlpost.org/wp-content/uploads/2023/05/pl.jpg)