Planning officer thuneihna kan tipung
– Chief minister
Planning leh Economic & Statistic officer-te chu an thuneihna leh thiltihtheihna an tipung tih chief minister Lalduhoma chuan a sawi.
Mizoram Planning, Economic & Statistical Service Association chuan Zirtawpni khan conference vawi 16-na an hmang a. Hmanpuitu chief minister chuan, sawrkar official data buatsaihtu leh department hrang hrang atanga project lo lutte lo zirchiang a, thlifimtute an ni, tiin, “Kan sawrkar hnuah phei chuan project proposal zawng zawng in hnenah a lut hmasa ta vek a. In thuneihna leh thiltihtheihna kan tipung a, in thutlukna hian kan ram future a chhun ruih a ni,” a ti.
Department hrang hrangin project an rawn ziah a inang lo hlawm hle dawn a. Chipchiar taka engkim zir a, ram tan enge min pek dawn tih man phaka an awm a ngai tih a sawi. “Project thenkhat, ho te anga lang, kan mamawh tak ni si a awm theih laiin; project ropui leh lian tak anga lang, insen thlawnna mai ni si pawh a awm thei. Kan resource a tam lo tih hre chungin, kan mamawh takah zel kut thlak kan tum dawn nia,” a ti. Data rintlak neih a pawimawh tih a sawi bawk.
Central fund hrang hrang kan hmu tha thawkhat niin chief minister hian a sawi a. A bikin SASCI leh DoNER ah phei chuan hma kan sawn a, an thawhrim zar a ni tih an hria a, an chungah an lawm hle tih MPE&SS Association member-te hi a hrilh a ni.
Tunah MPE& SSA ah hian member 44 an awm a, an conference inkarah an member pahnihin chatuan ram an pan san a, member thar pariat an nei thung.
Planning officer thuneihna kan tipung – Chief minister
