Mizoram Pollution Control Board leh Directorate of Commerce and Industries hnuaia Bamboo Development Agency tangdun buatsaihin July 25 & 26 khan mau hmanga hmanraw hrang hrang siam dan inzirtir a ni a. Eco Club hrang hranga an zirtirtu/ hruaitute an telin, an ni hi an club member-te hnena zirtir leh chhawng thei tura ngaih an ni.
Training hawnnaah Mizoram PCB chairman Liankima Lailung, IFS (Rtd) chuan Mizoramin leilung hausakna kan neih that ber mau hman tangkai kan zir a, thangthar lo la awm zel turte hnenah kan zirtir chhawn zel a tul tih a sawi a. Tawih ral thei lo plastic leh polythene aia kan hman uar deuh deuh a tul tih a sawi a ni.
Sawrkar laipuia Ministry of Environment, Forests & Climate Change bultumin Environment Education Programme (EEP) hnuaiah training hi huaihawt a ni a. EEP hnuaiah hian Mizoram school leh college hrang hrangah eco club din a ni tawh a, training-ah hian Mizoram district pasarih – Aizawl, Mamit, Kolasib, Serchhip, Saitual, Khawzawl leh Champhai atangin School Eco-Club incharge, Green teachers 85 an tel a. Tuna tel lo district dang tan pawh buatsaih leh tum a ni.
He training-in a tum ber chu, environment tha zawk siam turin kan nundan phung tha lo zawkte thlak a, environment tana him leh tlo zawk kan nunah senglut tura infuih leh zirna pek a ni. Training chhung hian single use plastics, vawikhat hmana kan paih leh mai thin, tawih ral mai si lote thlak nan mau atanga hmanrua siam chhuah dan zir a ni a; training chhuak master trainer-te hian an district huamchhung theuhah eco club naupang leh zirtirtute chu training an pe ve leh chhawng dawn a ni.
Plastic hman tihtlem nan mau hmanga hmanraw siam dan zir
![](https://theaizawlpost.org/wp-content/uploads/tap_logo-min-large.jpg)