Mamit tlawhtu Union minister of state Meenakashi Lekhi chuan plastic bawlhhlawh paih mai mai hmuh tur a tlem chu lawmawm a tih thu a sawi.
Zan hnih riaka Mizoram tlawhtu Union minister of state for External Affairs & Culture chuan Nilaini khan Mamit tlawhin sawrkar hotute a thutkhawm pui a. Aspirational district – Mamita awm sawrkar hnathawkte rilru puthmang chu mipui hmasawnna a ni tur a ni, tiin, mipui ta kan nih angin ram leh mipui tana theihtawp chhuaha hna thawk thin tur leh mipui mamawh hriat tuma rang taka chet la thin turin a chah.
Mamit chu plastic bawlhhlawh sawngbawl chungchangah fakawm a tih thu sawiin, an rawn kalna kawngah plastic hnawm paih mai mai hmuh tur a tlem chu thil lawmawm tak a ni tih a sawi a. Chutihrualin, nakin hun zelah plastic bawlhhlawh sawngbawl kawngah Mamit khawpuiin buaina a neih lohna’n tun atanga ruahmanna tha tak DUDO office kaltlanga siam a, buatsaih theih nise a duh thu a sawi.
Sawrkar official-te hian Union MoS hnenah district harsatna – health services, tui harsatna, zirna lam bakah kawng hrang hranga harsatna an neihte thlenin, sutkian a nih theihna’n thuneitute hnenah a thlen tur thu Meenakashi Lekhi hian a sawi. An harsatna sutkianna’n state dangte tih dan a theih ang anga entawn a, zawm ve turin a chah bawk.
Union MoS hian Govt. Mamit College a tlawh nghal a. Mamit atang hian haw turin Lengpui Airport a pan nghal a ni.
Plastic hnawm paih mai mai hmuh tur a tlem – Meenakashi Lekhi, Union MoS
![](https://theaizawlpost.org/wp-content/uploads/tap_logo-min-large.jpg)