Plunger chu movies-ah te pawh kan hmu fo tawh ang a, an inthiarna comode block a awm chang ten a tih tlang nan comode kuaah te pawh an sawh deuh sawk sawk thin, pipe hnawh vel tih tlang nan te pawh an hmang thin. Hetiang plunger hmang hian second 30 chhungin balloon 60 tikehin mi fate chuan Guinness World Records an lo siam leh tawh!
A hming chu Andre Ortolf a ni a, kum 32 mi a ni tawh a, amah hi German a ni. Balloon hampuar sa chu chhuatah a tlar dul mai a, chu chu a hmatiamin plunger chuan a hawlh keh ta pawp pawp mai a ni. A hmaa hetiang record chu 2025-a American Kevin Daane-a siam niin, second 30 chhungin balloon 23 a tikeh thei a, he record hi Andre hian a rawn khum ta a ni.
Andre Ortlof chuan, “A nuam khawp mai. Record siam tum rau rauah helhkham awm miah lovin, nuam ti takin, hlim takin kan ti thei. Min tinui hnem khawp mai. A titu ang bawkin a entu tan pawh a hlimawm a ni,” a ti.
Ortlof chuan, “Balloon kaihhnawih world record reng reng hi ka ngaihven zawng tak a ni a, a chhan pawh a hlimawm thin vang a ni. Plunger hmanga balloon tikehin record a siam theih tih ka hriat pawhin ka tuipui nghal em em mai a, record siam tuma beih ve hrim hrim ka tum ta a ni,” a ti.
Tun a record chu amah vêkin a la khum leh theih ngei a inring a, “Hma an sawn leh theihna tur a awmin ka hria. Ka inbuatsaihna balloon ho kha second 24 chhungin ka tikeh vek hman tlat mai a, chuvangin han inzir leh hlek ila chuan balloon tam zawk pawh kan tikeh hman ngeiin ka ring,” a ti bawk.
Plunger hmanga balloon tikehin record siam
