ZPM hotuten an sawrkar hma leh sawrkar hnu ah pawh mipui dawt an hrilh nasa a, kan hnam leh sakhuana atana thil tha lo a nih avangin ‘Dawt Hal Programme’ an siam dawn tih MNF Thalai president Robert Romawia Royte chuan a sawi.
Thawhtannia MNF office Mizo Hnam Runa inkhawmah MNF MLA Robert Romawia Royte hian, minister pakhatin Pathian an tih vanga utilization certificate dikloa siam an duh loa, SASCI sum lapse ta angin a sawi tih sawiin, dawt thupmawi nana Pathian hming hman chu pawi a tih thu a sawi.
“ZPM sawrkar hian SASCI sum hi a vaiin Finance department-ah an kawl tang tlat a, SASCI sum lapse kha ZPM hotute Pathian tih vang niloin, 1st instalment sum Finance-a pechhuak loa an kawl tlat vang zawk a ni. SASCI sum leh central project sum dangte pawh hlawhah an hmang zel a, chu chu sum an pekchhuah loh chhan a ni. Hlawh chu State Annual Budget atangin pe se, central project sum chu a project enkawltu department-ah pechhuak ve thin tawh rawh se,” a ti.
ZPM sawrkarah CBI chungchangah pawh inbumna a thleng mek a, CBI an hlauh chhan hi a rinzawn theih tih a sawi a ni.
Tunhnaia Council of Minister-in contractor-ten tender an chhan san theih zat leh chhan hniam theih zat bituk an siam chu contract dan kalh a ni tih MNF adviser hian sawiin, “Tender chhanna rate inang a tam dawn a, chhanna rate inangah thum an vawr zel dawn a nih loh chuan mahni duhsak zawng hna inpek tumna a ang a, MNF chuan kan enzui zel dawn,” a ti.
ZPM sawrkar hotuten khawchhhak atanga dan phal loh thil lolutte thla khat chhunga tihtawp an tiam laiin a zual tulh tulh a, kuhva ro kudama hrenbeh sa bag 5000 chuang pawh smuggler-ten nuamsa in an la chhuak thei tih Hachhek bialtu MLA Robert Romawia hian a sawi a. Kuhva tawlhrutute an huangtau em em chhan chu ZPM hruaitu thenkhat vang nia a lan thu a sawi bawk.
“Dan loa kuhva tawlhruk avangin Hachhek bialin kan tuar nasa a, Hachhek bialah hian dan loin tumahin kuhva rawn phurlut tawh lo se, lo phurlut lui an awm chuan an tan a pawi thei tih ka puang chiang duh a ni,” a ti.
PM hotuten mipui dawt an hrilh nasa – Robert Romawia
