PM-in chhiat an tawh sawipuiin Uttarakhand CM bia

PM-in chhiat an tawh sawipuiin Uttarakhand CM bia
Prime Minister Narendra Modi-a chuan Nilaini tuk khan Uttarakhand Chief Minister Pushkar Singh Dhami-a chu phone-a biain Thawhlehnia Dharali, Uttarkashi-a ruah bawhawk sur avanga sabereka khuangkaihin khaw pum a hnawl leh mi tam tak thihna thleng chungchangah a bia.
Prime minister hian thil thleng chanchin hi zawt fiahin chhanchhuah leh chhawmdawlna hna thawh dante a sawipui a ni.
Chief Minister Dhami-a chuan a sorkarin hma a lak dante hrilhin sorkar chu a inring sa a, agency dangte nen thawhhona tha tak neiin a tuartute buaipui hna an thawk mek zel tih a hrilh.
Ruah a la tlak chhunzawm reng avangin hmun thenkhat erawh tlawhpawh hleih theih a la ni lo tih chief minister chuan a hrilh a; mahse, chhun zan zawma thawkin a theih ang angin kilkhawr zawka mite pawh puih an ni tih a sawi.
Chief Minister Dhami hian prime minister an inbiak thu hi X-ah tar langin, “Prime Minister Narendra Modi-a’n tukin khan Dharali-a chhanchhuah leh chhawmdawl hna thawh dante phone-in min rawn zawt a. Zankhuaa thawh a nih dan leh mi eng emaw zat hmun himah lak chhuah an nih thu te, ni tin khawsak harsatna thlen dan te pawh kan inhrilh a ni,” a ti.
Prime minister-in a ngaihven chu lawmawm a tih thu Dhami chuan sawiin, “Prime chungah puih kan ngaihnaa puih min tiam avangin kan lawm tak zet a. Chhanchhuah hna thawktute nen pawh kan inbe reng a, kei ngei pawh Dharali-ah hian ka kal dawn a ni,” a ti.
Dharali-a thil thleng hi Thawhlehnia tlangram state-a ruah bawhawk sur avanga sabereka khuangkaih a thlen vawi hnihna a ni.
Thawhlehniah khan Modi-a hian sebereka khuangkaih thlenga army camp tela mi eng emaw zat a hnawl avangin a lo be tawh a, sipai pawh tam tak chin hriat lohvin an awm.
Sabereka khuangkaih pahnih avang hian tam tak chin hriat lohva awmin thil tam tak a chhia a. Chhanchhuah hna thawh chu ruah sur reng avangin a thawh chak theih loh hle bawk.
Hetih lai hian India Meteorological Department (IMD) chuan Uttarakhand-ah hian ruah tam tak a la sur chhunzawm dawn niin an la sawi lawk a. Uttarkashi, Rudraprayag, Chamoli, Bageshwar, Pithoragarh, Udham Singh Nagar, Dehradun, Nainital, Champawat leh Pauri Garhwal district-ah te a la sur dawn tih an sawi a ni.