PM-KISAN Scheme kaltlangin Mizorama
loneitu nuai 1 chuang hnenah puihna hlan
Prime minister Narendra Modi chuan India rama kuthnathawktute tuamhlawmna scheme pui ber, PM-KISAN Samman Nidhi hnuaia tanpuina, 20th instalment chu Varanasi Uttar Pradesh atangin direct benefit transfer hmangin Inrinni khan a sem chhuak a. India rama kuthnathawktu vaibelchhe 9.70 hnenah a vaiin cheng vaibelchhe 20500 hlan a ni. Heng zingah hian Mizorama kuthnathawktu mi 131238 pawh an tel a ni.
Mizorama district hrang hranga District Agriculture Office leh Krishi Vigyan Kendra atangin live telecast kaltlanga Prime minister hoa hun hman hi an chhim a. State level programme chu KVK Aizawl Selesih-ah hman niin, Environment Forest & Climate Change minister Lalthansanga’n a hmanpui. Agriculture & Farmers Welfare department hotute pawh special secretary Ramdinliani hoin an tel a. KVK hotute, PM-KISAN hamthatna dawngtute leh farmer producer’s organisation member thahnem tak an tel bawk.
Minister chuan Mizorama kuthnathawktu tam takin PM-KISAN kaltlanga sawrkar laipui tanpuina an dawng thin chu lawmawm a tih thu a sawi a. Scheme-in a tum leh a beisei ang ngeia tangkai taka hmang turin hamthatna dawngtute a chah. State sawrkar flagship programme Bana Kaih Scheme phase-2 hnuaiah kuthnathawktute tan online application dil theih a nih thu a tarlang bawk.
PM Kisan Scheme hi kum 2019 atanga bul tan niin, Mizoramah pawh Agriculture & Farmers’ Welfare department hmalaknain kalpui a ni. He scheme hnuaiah hian kuthnathawktuten tanpuina kum khatah Rs 6000 an dawng thin a, installment thumin Rs 2000 zela pek an ni.
PM-KISAN 20th instalment sem chhuahnaah hian Mizorama kuthnathawktu mi 131238 hnenah a vaiin Rs 38,06,86,000 sem chhuah a ni a, hei hi 2025- 2026 sawrkar kum chhunga installment vawi khatna a ni.
PM-KISAN Scheme-ah hian sawrkar hnathawk emaw pensioner emaw awm lohna (Group D tiam loin) kuthnathawk chhungkua atangin mi pakhat zel inziahluh theih a ni a. A dawng tlak ngeiten hamthatna hi an dawng a, la inziaklut lo tan pawh a inziahluh theih reng a ni.
PM-KISAN Scheme kaltlangin Mizoramaloneitu nuai 1 chuang hnenah puihna hlan
