Prime Minister Narendra Modi chuan July 26 khan Pakistan chu Jammu and Kashmir a proxy war kalpuia puhin hmelmate chu an phutawk chhanletna pek an ni ang a ti a. Hei hi tun hnaia Jammu region a firfiakte chet hluarna a sawina anga ngaih a ni.
“Pakistan hian tun hma pawhin sual kawhmawh a bawlah a hlawhchham a. Pakistan hian history atangin engmah a zir ngai lo. Firfiakna leh proxy war thlawpin relevant a tum reng a ni. Master of terror tena min hriatphakna tur ngeiah thu ka sawi mek a. terrorism patron te hnena ka sawi duh chu sual kawhmawh in bawlna hi a hlawhtling dawn lo. Kan sipaite chuan firfiak te nuaichimitin an phutawk in an chhang let zel ang” tiin Modi chuan a sawi.
Prime Minister hian kum 1999 Kargil war cham 25-na ‘Vijay Diwas’ tia hmanah thu a sawi a. Kargil district Drass a War Memorial a war heroes te zahna a hlan bawk.
PM Modi chuan Indian Army anti-enemy operation Himalayas tlangsang atanga kalpui chungchang sawiin, “India-in remna a duh a, hmelma ten hmai hnih an nei a ni. A tawpah dawt chu hnehin a awm a. Kargil indonaa hnehna khan kan ram venhimna leh kan sipaite huaisenna a pholang a ni. Indona hmun khirhkhan takah kan sipai ten hlawhtling takin chakna an chang a ni,” tiin a sawi.
Kargil leilung chuan kum 25 kalta khan mihuaisen te inpekna thuk ber a hmu a ni, a ti a. “He ram tana nunna chantute chu chatuanin an nung reng ang a. Kargil war a martar te lakah ramin leiba a nei a ni,” tiin PM Modi chuan a sawi bawk.
Prime Minister chuan India chuan Ladakh emaw Jammu & Kashmir a hmasawnna tibahlah thei a hneh vek dawn a ti bawk a. “August htlaah Article 370 nuaibo kum nga na chiah a ni dawn a. Jammu & Kashmir in hma lam hun eng tak a nei a ni. Infrastructure development mai bakah Ladakh leh J&K ah tourism sector a thang chak hle a ni,” tiin a sawi bawk.
August 5, 2019 hnuah Kashmir a cinema hall zahve chu hawnin a awm tawh a ti bawk a. “Kum sawm thum chuang hnuah Tazia procession (Shia Muslims) chu Srinagar ah a tum khat nan neih a ni ta a. J&K in hlawhtling takin G-20 meeting a thleng a. Kan lei vanram hian remna leh munna a pan zel a ni” tiin a sawi bawk.
Union Territory of Ladakh tana budget Rs 6000 crore dah chungchang pawh sawiin Modi chuan Ladakh chuan dream thar neiin a sang chak hle a ni a ti bawk a. “Ladakh hian 4G network a nei thuai ang a, 13-km Zojila tunnel a nei bawk ang a, eng hunah pawh tlawh pawh theih a ni tawh ang,” tiin a sawi bawk.
PM Modi chuan Congress te chu tun hmaa armed forces te demand tihlawhtling thei lovah a puh bawk a, “Congress te chuan sipaite mamawh a phuhruk thei lo, Army leh IAF te mamawh a phuhru ngai lo. An mamawh an sawi te pawh tihhlawhtlin a ni ngai lo. Reforms mamawhna sang takah kan sorkar chuan sipaite ngaithlain vawiinah chuan ralthuam 5000 ram pawn atanga thawnchhuah tawh ngai loh kan nei a ni,” tiin a sawi.
Agnipath scheme sawi mawiin PM modi chuan, “Army in reforms tihmakmawh a kalpui a ni. Mi thenkhatte chuan Army te chu politician te chibai buktu leh parade ang lekah an ngai a. Mahse Army chu mipui vaibelchhia 140 te rinna nghahna an ni. Agnipath scheme thiltum chu Army thalai zawk leh indo tura inpeih at tura siam a ni” tiin a sawi.
Opposition tena Agnipath scheme an sawisel chungchang sawiin PM Modi chuan, “Vanduaithlak takin, mithenkhatte chuan national security kaihhnawih pawimawh te politics thilah an la a ni. Heng mite hi kan Army te scam crore sang tel hmanga tichak lo tute zawk an ni a. Heng mite hian Army leh IAF te chu self-reliant turin an duh ngai lo. IAF in Tejas nei lo se duhtute an ni” tiin a sawi.
A hmain Prime Minister Narendra Modi, Indian Army Chief General Upendra Dwivedi, Chief of Air Staff Air Chief Marshal V.R. Chaudhari leh Navy Chief Admiral Dinesh K. Tripathi te chuan Kargil War Memorial, Drass tlawhin zahna chibai an lo buk tawh bawk a.
India capital New Delhi-ah pawh Defence Minister Rajnath Singh chuan kum 1999 Kargil War a nunna chan te National War Memorial ah zahna chibai a buk bawk.
PM Modi-an firfiakte phu tawk pe zel dawn ti
![](https://theaizawlpost.org/wp-content/uploads/Clipboard01-1970.jpg)