West Bengal Chief Minister Mamata Banerjee chaun Red Fort atanga Prime Minister Narendra Modi-an Independence Day thuchah a sawi chu Prime Minister a nih anga a sawi tawpna tur tiin a sawi.
“Modiji Indpendence Day thuchah hi Prime Minister a nihna anga a tawpna tur a ni a. Nakumah chuan Team INDIA chuan Red Fort ah National Flag an pawt pharh tawh ang,” tiin Mamata Banerjee chuan a sawi.
Trinamool Congress chairperson chuan Indian National Developmental, Inclusive Alliance (INDIA), an party pawh an telna te chuan nakum inthlanpui neih hunah ram pumah Bharatiya Janata Party (BJP) te chu titein an hneh ang tiin a sawi bawk a.
Banerjee chuan “Bengal-in eng chair mah a duh lo,” tia sawi bawkin mipuite chu BJP te paihthla tura Opposition te thlawp turin a ngen bawk a.
West Bengal chief minister chuan BJP rorelna hnuaiah tute mah independent-in an awm lo a ti bawk a. “State sorkar te hi independent an ni em? An duh dan dana min nawr tawmin kan chan tur fund te pawh min tihtawpsak a ni,” tiin a sawi bawk.
West Bengal Chief Minister Mamata Banerjee chuan Mahatma Gandhi hnena zahna hlan aiah BJP te chuan amah thattu zahna an lantir zawk a ti bawk a. BJP kaihhruai Union government chu issue hrang hrangah demonetisation leh Rafale aircraft lei chungchangah te sawiselin eiruknaa inchiah an ni a ti bawk.
PM Modi thuchah hnuhnung ber tur : Mamata
