Senior Congress leader Rahul Gandhi chuan Prime Minister Narendra Modi chuan Other Backward Class chhungkua a piang intia insawiin dawt a sawi a ni tiin Odisha a Jharsuguda a Bharat Jodo Nyay Yatra a neihnaah a sawi.
“In Prime Minister hi OBC chhungkua atanga piang a ni lo general caste a ni a. Gujarat a Teli caste a piang a ni. Bharat Janata Party Government chuan a caste chu kum 2000 ah OBC category ah an dah chauh a. OBC a piang tiin khawi hmunah pawh dawt a sawi a ni” tiin Gandhi chuan a sawi a.
“Eng tiangin nge OBC a ni lo tih ka hriat in hre duh em? Thudik lailang turin birth certificate ka mamawh lo. OBC mi leh sa nihna a nei lo va, loneitute leh labourer te kut a vuan hek lo va, Adaniji kut chauh a vuan” tiin Rahul Gandhi chuan a sawi bawk.
“A dam chhung zawngin PM Modi hian caste census a kalpui dawn lo a chhan chu ram pum hriatin OBC a ni tiin dawt a sawi vang a ni. Thudik tak chu general caste zawk a ni” tiin Congress leader chuan a sawi bawk a.
“Congress leh Rahul Gandhi chaun caste census kan kalpui a. Caste census leh social justice chungchang ka sawi apiangin Modi chuan caste pahnih chauh – hausa leh rethei chauh an awm tiin a sawi ziah a ni. Caste pahnih chauh a awm chuan PM hi eng caste nge ni ang? Mirethei i ni thei lo, i suit hak pawh crore man a ni a. Caste pahnih chauh a awmin engtiangin nge OBC i nih theih ang” tiin Rahul Gandhi chuan a sawi bawk.
“Modi hian zing lama a thawmhnaw hak chu chhunah leh tlaiah thlakin a dang a ha zel thin. Nitin thawmhnaw hrang hrang a ha ang a. OBC community intiin dawt a sawi bawk a. Modi hi Modh-Ghanchi caste chhuak a ni zawk a. backward class community te bumin PM a ni” tiin Gandhi chuan a sawi bawk.
“Economic justice thilah pawh in PM hian business tenau a tichhe vek a. GST leh demonetisation a kalpui chhan chu Adaniji a puih duh vang a ni. India ramah Odisha-ah ngei pawh thalai ten hna an hmu zo lo. Industrialist lian te chuan China siam product hralhin China thalai te sum an thawhchhuah sak a ni. India mipui te chuan sum an seng ringawt chauh zawk” tiin Congress leader chuan a sawi bawk.
“Mipui te inflation theihtawpin an do a, Petrol leh food price sangin a tibuai a. Chugn te chuan Adaniji leh Modiji te a tibuai ve lo. Modi chuan thawmhnaw man to tak tak a lei a. PM hlawh hi Rs 1.60 lakh a ni a, chutihlaiin a thawmhnaw man chu Rs 2 lakh atanga Rs 3 lakh te niin nitin thawmhnaw a thlak bawk a. A nitin inthuamna te chu Rs 7 atanga Rs 8 lakh vel a ni. Khawi sum nge a neih? PM hian mipui a bum char char mai a ni” tiin a sawi bawk.
“Odisha ah hian BJP leh BJD ten loneitute an rawk a. An danglamna chu letter P leh D chauh hi a ni, tangruala thawkdun an ni a. Tribal ram ruksakin an buai em em reng a, drone hmangin tribal ram survey an nei a. Ram information chuan Adaniji leh Ambaniji te hnen a thleng a, industrialist te chuan chung ram te chu an rawn nei mai a ni” tiin Congress leader Rahul Gandhi chuan a sawi bawk a. Gandhi hian Manipur atanga tanin Bharat Jodo Nayay Yatra chu a la chunzawm reng a ni.
PM Narendra Modi hi OBC a ni lo : Rahul Gandhi
