PM SHRI School-a hlankai tlawh
Prime Minister School for Rising India (PM SHRI) tlawha zin central nodal officer (CNO-PM SHRI), Ministry of Rural Development joint secretary Lalchhandama leh a thawhpuite chuan Ningani zan khan Serchhip district bawrhsap Paul L Khuma hoin district thuneitute nen an thukhawm.
Mizorama sawrkar primary school 1182 awm zingah 31 chu sawrkar laipui hmalakna PM SHRI-ah thun an ni a. Serchhip district-ah chuan Khawlailung leh Buangpui Primary School chu kum kalta June atang khan PM SHRI school-ah hlankai an ni. Prime minister hoa thla tin thutkhawm – Pragati Meeting thurel kalzelah sawrkar laipuia joint secretary 100 chuang chu India ram puma PM SHRI School tlawh chhuak tur leh an dinhmun endik tura ruat an ni. Joint secretary Lalchhandama hi Mizoram tlawh tura ruat niin, Serchhip district-a Mizoram govt primary school pahnih – Khawlailung leh Buangpui Primary School bakah central school – Jawahar Navodaya Vidyalaya Thenzawl a tlawh a ni.
PM SHRI School hi sawrkar laipuiin a ngaihven a, endik hna a thawk dawn tih sawiin, Education department bakah district thuneitute chu theihtawpa tang turin a fuih. Sawrkar leh private school dangte tana entawntlak – model ni turin thawktuten an chawikan a tul dawn tih a sawi a ni.
JNV School Thenzawl hi kum hnih chhung PM SHRI an nih tawh avangin hmalakna thui tak an kalpui tawh a. Primary school pahnih – Buangpui leh Khawlailung chu June 2025-a thun an ni a, tun thlengin fund an la dawn loh avangin hmalakna thui tak hmuh tur a la awm rih lo tih sawi a ni.
PM SHRI School-a hlankai tlawh
