PM USHA hnuaia hna inpek dan RTI-in rawn dil se kan ti – H&TE minister

PM USHA hnuaia hna inpek
dan RTI-in rawn dil se kan ti
– H&TE minister
PM USHA hnuaia Higher & Technical Education department-a hna thawhah dan bawhchhiatna a awm loa, rinthua inpuhmawh aiin a hrechiang duh chuan RTI dan hmangin rawn dilchhuak se an duh hle tih Higher & Technical Education minister Dr Vanlalthlana chuan a sawi.
Assembly Session-a zawhna chhangin H&TE minister chuan, PM USHA hnuaia an department-a hna, restricted tender-a pek nia thu thehdarh chu open tender zawk a ni tih a sawi a. Tender-ah empanel firm an tel lo tih pawh hriatsual palh a ni, tiin, an chhuichiannaah an thulakna hi eptu member pakhatin thu a hriatsual palh vang nia a hriat thu a sawi.
Hna thawk tura thlan Royal Consultancy Services chu department thawktuten comparition statement an siamah ‘Royal Construction’ tiin an lo dah palh a, hei hi tute emaw in la vawngin empanel firm ni lo minister-in hna a pe niin an sawi ta tih a sawi.
“Tender thehluttu, tender document zawng zawng nen kan kawl a, RTI-in rawn zawt se, Royal Consultancy Services hi empanel firm ngei an ni,” a ti.
College zirtirtu qualify lo chunga thawkte chu tum 9 warning pek an ni a, chuti chunga qualify tum lo chu kumin March hian an hun a tawp tawh tih H&TE minister hian a sawi bawk.
College zirtirtu qualify lote chu kum 2017 atang khan chance pek an ni tawh a. An demawm lohna chu, lak an nih dawnin advertisement-ah NET (National Eligibility Test) neih a ngaih thu a lang tel loa, a hnu ah sawrkarin NET nei turin a ti a, kum hnih khat hnua thlawn thei mai an nih avangin hriattir lawk an ni fo a, tum 9 warning pek an ni tawh tih a sawi.
Zirtirtu qualify tam tak an awm karah an ni an qualify thei si loa, University Grants Commission-in zirtirtu qualify chauhin zirtir tawh tur a tih bawk nen, March thla bak chu hun an nei tawh lo tih a sawi a ni.