PM Vishwakarma kalpui dan thlirlet

PM Vishwakarma kalpui dan thlirlet
Mizorama PM Vishwakarma scheme kalpui dan thlirletin chief secretary charge latu H Lalengmawia hoa thutkhawm a ni.
Commerce & Industries secretary Dr Lalzirmawia Chhangte leh joint secretary, LESDE director, district tin bawrhsap, State Level Bankers Committee coordinator, NSDC State coordinator, Mizoram Rural Bank chairperson leh a kaihhnawih official dangte an tel.
PM Vishwakarma hi central sector scheme niin, 2023 September 17 khan kalpui tan a ni a. India rama kutthemthiamte (artisans & craftsmen) tihhmasawn leh khaichhuahna tura duan a ni.
He scheme hi Ministry of Micro, Small and Medium Enterprises, Ministry of Skill Development and Entrepreneurship leh Ministry of Finance-a Department of Financial Services thawhhonaa kalpui a ni.
PM Vishwakarma tum chu – kutthemthiamte thiamna hriatpui a, he scheme hnuaia hamthatna awme hmang thei tura tanpui; tunlai khawvel mila an thiamna belhchhah; an theihna leh thilsiam quality belhchhah tura tanpui leh hnathawhna hmanraw changkang zawk ngaihtuah sak.
Hei bakah dahkham awm lo leh a punna hniam zawka loan awlsam taka an lak theihna tura tanpui; digital transaction an hman tam theihna tura ruahmanna siamsak leh, an thil siamchhuah hralh kawnga tanpui a ni.
Mizoramah tanpuina dawng thei tura inziaklut 10740 an awm tawh a, stage-I a pawm 7900, stage-II a pawm 7269 leh stage-III a pawm 3297 an ni.
Tun tum thutkhawmah hian tanpuina dil tura inziaklut ho loan lak atanga a pung rulh tur zat ngaihdam leh bank nena inthlunzawnna tha siamsak bakah tha leh chak zawka district tina skilling leh training kalpui dan tur rel a ni.

Comments (0)
Add Comment