Mirethei in sak sakna tura sawrkar laipui ruahmanna, PMAY-ah a dawng tura thlanfel tawhte account tihdanglam leh thlak sak an awm a, department lam tih dik loh finfiahna a awm chuan action an la dawn tih chief minister Lalduhoma chuan a sawi.
Thawhlehnia Assembly Session-ah PMAY Rural leh Urban chungchang hi sawi a ni a. Account thlak chungchangah department mi ten an hriatpui loh chuan VC chauh chuan an thlak theih rin a nih loh thu sawi niin, RD minister chuan, thil dik lo awm chu tih dik ngei an tum anga, tihsual palh a awm thei a, tisual luite erawh an hrem ve ang tih a sawi a ni.
House leader, chief minister Lalduhoma chuan account tihdanglam emaw account neitu hming thlak emaw a awm chuan inhriattir nise, a tul angin action an la dawn tiin House a tiam.
“Beneficiary-te hi Congress hunlaia thlan an ni a, an zingah thi leh pem an awm chuan, district tinah DC hoin a aiawh tur an thlang leh thin. He scheme hrim hrim hi Zopa rilru nen a inmil loa, 1st instalment hmanga sak tur chin an bituk a, sak zawh nghal an awih lo hrim hrim. Sa zo nghal chuan an dawng nawn thei tawh lo,”
An in thiatin pawisa an puk a, 2nd instalment a lo kal har si a, an nghak hman loa, a thenin an lo sa zo a, sa zo tawh chu dawn an awih tawh bawk si loa, chuvangin khaw thenkhatah VC-ten tha zawka an ngaihdanin ruahmanna an lo siam ve a, tute emaw dawn tur kha pakhatin a dawn tur a dawn zawh vek theih nan pek mai an rawt a, a lokal leh hunah a hmaa dawng lo ten dawng zo ve leh se, an ti a. Heng VC te hi term lehah an lo tling leh tawh si loa, VC tharin kal dan tharin an rawn ti ve leh a, a buai ta nuai mai, tiin a sawi a ni.
“PMAY hi a hnawk nasa a, he hnawk tlingkhawm chinfel hi har tak tur a ni a, minister leh a thawhpuiten theihtawp an chhuah anga, siamfel ngai ang ang chu an siamfel thei turah ngai ila, diklo a awm a, chiangkuang taka finfiahna a awm phawt chuan action lak a ni ang,” Lalduhoma hian a ti.
RD minister thusawi dang:
# Instalment dawng tawh si, la pek zawh loh an awm nual a, a completion a tlem phah tih a sawi. Socio Economic and Caste Census 2011 behchhanin central-in automated priority list a rawn siam a, BPL in leh lo nei lo an thliar a, hei hi beneficiary atan rin nghal a ni.
# Mizoramah chhungkua 24300 in PMAY (Gramin) tanpuina instalment an dawng tawh a, tanpuina dawng thei tur Management Information System (MIS) a attached zat chu chhungkaw 29967 a ni.
# PMAY (Urban) ah chhungkua 36536 in instalment an dawng tawh a, tanpuina dawng thei tur MIS-a attached zat chu beneficiary 37244 an ni.
# PMAY (Gramin) bikah target chhungkaw 29967 atang hian 2024 January 1-a completion rate chu 8253 a ni a, a puma la zawh loh 21714 a ni a. Instalment dawng tawh si engemawzat an awm a, sawrkar thar hnuaiah March 12 thlenga final instalment pek theih tur chu 15975 niin, January atanga tun thlengin 7722 zo thei turah an ngai, hmabak 14019 a la awm dawn tih a sawi a ni.
# 1st leh 2nd instalment dawng tawh pawh nise, an la dawn kim loh chuan achievement report a chhiat phah thin a. Tunhnaia thutkhawmah a completion hi ngaihpawimawh tur tiin hma an la chho a, achievement a tha chho tan viau.
# Finance department-a an ngen angin kumin March 11 khan cheng vaibelchhe 42 an release sak a. Hemi hmang hian buaipui zui niin, achievement hi zaa 95 an neih kha tunah chuan zaa 97 kai chho turah an ngai. March 14 hian Delhi-ah Empowered Committee an thukhawm dawn a, hetah hian department hotute an kal anga, tlemin an hmai a zuk uang ve thei deuh turah an ngai a, vaibelchhe 114.47 an la hmabak chu an achievement an en anga an rawn pek thuai rin a ni.