Sawrkar laipuiin sakhaw tlem zawkte chawikanna atana ruahmanna a siam, PMJVK hnuaia hna pek danah work order leh hna pek dan phung ni loin sawrkar hmasa in hna a pe niin chief minister Lalduhoma chuan a sawi a. Sawrkar hmasaa Minority Affairs minister Robert Romawia Royte chuan chutianga pek a awm lo tih sawiin, a awm a nih chuan ziaka a list tichhuak turin a phut.
Thawhlehnia Assembly Session-a zawhna leh chhanna hunah PMJVK chungchang zawhna awmte District Council & Minority Affairs minister C Lalsawivunga chuan a chhang a. Sawrkar hmasa hunlaia project siamte chu sawrkar laipuia Ministry of Affairs ah thawn vek tawh nia sawiin, a concern department hriatpui loha project siam leh thehluh awm chuan department tan harsatna a siamsak tih a sawi.
Sawrkar hmasa hunlaia DC&MA department leh consultancy firm – NECS-in thawhdunna thuthlung an siam chu a tawp tawh a, hemi hnu hian sawrkarin thawh dunpui a nei tawh rih lo tih a sawi bawk.
Zawhna chhanna kal zelah House leader Lalduhoma chuan PMJVK hnuaiah hian work order pawh awm lo, hna inpek dan phung pangngai pawh zawm loa kal paha contract hna inpek a tam a, heng zinga hna thawk zo tawhten bill an rawn siam a, khawi atanga pek tur nge an hre thin lo tih a sawi a. 2nd instalment an la dawn theih loh chhan pawh hetihlaia hna inpek tam tak, hna la zo thei lo te vangin utilisation certificate an thehlut thei lo niin a sawi. PMJVK chu ruahman a nih danin health leh education lama hman tam ber tur a nih laiin Mizoramah zaah za deuhthaw sports infrastructure lama hman a ni tih a sawi bawk.
MNF MLA Robert Romawia Royte chuan an sawrkar laiin PMJVK hnuaiah dan loa hna inpek a awm lo tih sawiin, chief minister-in hetiang a hria a nih chuan a list siama tichhuak turin a phut a. Chief minister hian an tihchhuah tur thua chhangletnin, hemi kaihhnawihah hian hun engemawchen House ah inhnialna a chhuak zui a ni.
PMJVK hnuaia hna pek danah House-ah inhnialna a chhuak
