Tunlai hian MotoGP lam pawhin nipui chawlh rei lutuk lo an hmang chho ve ta a, August ni 17-a Austria leilunga Grand Prix an Tan leh hma zawng Ducati Lenovo rider Marc Marquez chuan hma a hruai chhunzawm dawn a, amah hnaihbertu leh a nau ni bawk Alex Marquez of Gresini Ducati lakah point 120-in a fal tawh.
Karliamta khan Brno khawpuia Masaryk Circuit-ah tun season intlansiak vawi 22 awm tura a vawi 12-na an tlan a; tah khan Inrinni aitechhinna Sprint race leh Pathianni Czech Republic MotoGP race-ah Marquez upa zawk hi a chak ber ve ve a; chutih laiin Alex hi Pathianni race-ah tlanchhuak zo loin a talbuai a, a career-a MotoGP title vawi ruk ngawt la tawh Marc Marquez chuan fal zawkin hma a hruai theih phah ta a ni.
Czech Republic MotoGP-ah khan Marc-a team-mate Francesco Bagnaia chuan season kal laia a vawi khatna’n pole position luah bawk mah se lap khatna zawh dawnah Aprilia khalhtu Marco Bezzecchi a inlehpelhtir a, insiamTha zo loin lawmman semna dawhsan chuangkai pha lo tawkin palinaah a tawp zui ta nghe nghe a ni.
Brno khaw tlankawnga a chak leh hnuah kum 32 mi Marquez kha Ducati rider zinga MotoGP Grand Prix-a vawi nga chak zawn thei hmasaber niin, a elpui lian ber Alex Marquez chuan lap hnihna lekah Honda rider Joan Mir nen an chetsual dun avangin point a thawkchhuak zo lo.Inrinni Sprint race-ah pawh 17-na ni pha chauh Alex tan chawlhkar chhe tak niin, Pathianni race-ah parukna inchuha Mir nen an inthlur laiin an chesual ta a ni.
Race hmabak chanve dawn la awm bawk mah se Marquez upa zawk tan championship title a beiseiawm chhunzawm zel.
Czech Republic rama hnehna changlehtu Marc chuan Tha tulh tulha a inhriat thu a sawi a, season bung chanve a zawh danah a lungawi hliah hliah tih belh chungin intlansiak vawi 10 lai a la awm thuin a infuih zui nghal a; nipui chawlh an nghahchhuah tak thu leh in relax ve zawk hun a herchhuak tih sawiin, chawlh hmang mah se a rilru put hmang leh hnehna chang tura chhungril lam aTanga nawrtu chak tak chu vawnnun chhunzawm zel a tum thu a tarlang tel.
Vawihnih champion ve tawh Bagnaia hmakhalhtu Aprilia rider Bezzecchi kha kumin May thla British Grand Prix-a Marc Marquez hnehtu niin, Pathianni race-ah pawh Ducati rider hnaih bertu niin lawmman semna dawhsan chung ber dawttu a luah pha a; pathumna chu Red Bull KTM rider Pedro Acosta a ni.
Lawmman dawng pha lo tawk chiahin thleng mah se Bagnaia khan riders’ championship standing lamah pathumna la luah chhunzawmin, hmahruaitu Marc nena an inthlauhna erawh point 168 lai a ni tawh thung.
Intlansiak tawp dawn lamah Italian rider Bezzecchi khan rawn nawr na deuh mah se Spaniard Marquez kha second 1.753-in a thleng hmasa ta tho a, season kal laiah vawi riat a chak tling ta.
Czech Republic MotoGP-ah khan Aprilia team pawhin lawmna tur an nei ve a, hliam avanga round hmasa vawi 10 zet inlan thei lo defending champion Jorge Martin chuan a vawi khatna atan Grand Prix a tlan chhuak a, pasarihna lai a nih phak avangin a team-te an lawm hle!