Point 4 in Arsenal an sang fal

Pathianni zan khan English Premier League khelh chhunzawm a ni a, Arsenal in an mualah hnehna an chang a, table chung ber luah nghetin point liin an sang fal tawh. Arsenal an chak lai hian team lian Manchester City an tlawm. Team lian Liverpool leh Manchester City tlawm laia chak hi Arsenal tan result duhthusama tha a ni.
Gunners chakpuitu Eze
Table-a hmahruaitu Arsenal hian Emirates Stadium-ah season kal meka khel tha tak Crystal Palace an mikhual. Palace lakah hian nipui bazar inhawn laia an lak luh Eberechi Eze goal thun hmanga chakin, point thum hlu tak an hmu.
Arsenal leh an mikhual Crystal Palace te hi an inhnehtawk viau a, goal lut pawh an awm mai thei lo. Inhnehtawk taka an innawr tawn hnuin Gunners in Crystal Palace atanga £67m zet senga an lak luh Eberechi Eze chuan Declan Rice free-kick kal zelah chiang zetin a hlap goal a, minute 39-naah hmahruaina goal a thun. Eze hian a club hlui Crytal Palace lakah Arsenal tan a goal hmasa ber a thun. Beiseina sang tak nena la luttu Arsenal tan rintlak a nihzia goal hmangin a tifiah leh zual.
Eze goal thun hnuin inkhel a hmuhnawm zui viau a, goal thun tumin an innawr tawn nasa hle. Chawlhlawk hnu lamah Arsenal in goal an thun belh teuh hle a, defender Gabriel chuan a tauh goal teuh hle. Palace pawhin an si phurh sut tumin tan an khawh nasa viau a, Arsenal tlar hnung an nawr buai thei viau. Arsenal player pawiawh Saka lakchhuah a ih hnuin Palace hian an nawr bet leh zual. An khingpuite nawr bet mah se hun tawp thlengin goal an thun the lova, Arsenal lakah uiawm takin an tlawm.
Crystal Palace hi kar laihawl khan Europa Conference League-ah an mikhual AEK Larnaca hneh lovin an lo tlawm tawh a. Arsenal lakah chak an tumna pawh uiawm takin a thamral zui leh ta bawk.
An mikhual Crystal Palace lakah an chak vangin Arsenal in an hmahruaina an tizau leh zual. Gunners hian khelh 9 atangin point 22 an hmu mek a, an hnuai chiaha awm AFC Bournemouth aiin point liin an sang zawk mek. Manchester City leh Manchester United te aiin point rukin an sang zawk mek a. Champion lai Liverpool lakah point 7 zetin hma an hruai fal tawh bawk.
Pathianni zan khan AFC Bournemouth chuan an mikhual Nottingham Forrest chu Marcus Tavernier leh Eli Kroupi te goal thun hmangin an hneh a, Arsenal tih loh club lian dangte chungah chuangin pahnihnaah an inhlangkai. Bournemouth in hma an sawn zel laiin Nottingham Forrest an talbuai thui zel thung. Khelh 9 atanga point 5 chauh la hmu Nottingham Forrest hian manager thar Sean Dyche hnuaiah chak nghal tum viau mah se an hlawhtling zo lova, tlahniam thei dinhmun him lovah an ding chhunzawm zel.
City an chak lo
Pathianni zana inkhel ngaihven hlawh dangah Manchester United chu Aston Villa lakah an tlawm a, top 4 huang atangin hnawhchhuah an ni.
Manchester City hi Aston Villa hmachhawn turin Villa Park-ah an leng lut. An len luhna mualah bul an tan tha lova, goal an chhuah hma hle. Inkhel tan atanga minute 19-na lekah Matty Cash chuan Villa hmahruaina goal a thun. Hma taka goal an chhuah hi City in sut tum viau mah se hun tawp thlengin an sut thei lova mak tak maiin an tlawm. Season kal mekah club leh ram tan Erling Haaland a chetha hle a, dang thei an awm meuh lo. Match 11 chhung zet goal thun zawn tawh Haaland hi Aston Villa in an lo dang a, goal thun thei lovin an siam.
Team lian Manchester City an hneh vangin Aston Villa in table-ah hma an sawn a, khelh 9 atanga point 15 hmuin pariatna an luah thar. Villa hi pahnihnaa awm mek AFC Bournemouth nen point thum chauhin an inthlau a, hei hian phurna nasa tak a pe thar.
Pathianni zana inkhel dangah Tottenham Hotspurs chuan mikhual an nihna hmun Goodison Park-ah 3-0 in hnehna an chang a, khelh 17 atanga point 17 hmuin pathumnaah an inhlangkai a, hma an sawn zel.
Goodison Park-a lenglut Tottenham tan hian Micky van de Ven chuan goal hnih a thun a, Matar Sarr chuan goal khat a thun bawk. Spurs in hmahruaina goal an thun hnuin Everton in an si phurh an sut hman zet a, an goal thun hi VAR rawn a nih hnuin hnawl a ni thung. Everton goal thun an pawm lo hian Tottenham a tiphur leh zual a, tha taka inlan zuiin goal hnih ngawt an thun belh a. An elpui lian Arsenal um zel zelin top three ah an tel ta hial a ni.