Pathianni zan khan English Premier League (EPL) hmahruaitu Arsenal chuan Emirates Stadium-ah Crystal Palace an mikhual a. Manager nghet nei lova awm mek Crystal Palace lakah 4-1 a chakin, point riatin hma an hruai fal a, champion turin hma lam an pan zel.
Hmahruaitu Arsenal hian an mualah an khel tha viau a, an mikhual lakah mit la takin an inlan. Ball chang tam leh hlauhawm siam chhuak tam zawk an nih vangin goal pawh an thun har lo. Minute 28-naah Saka siamsak chu fuh taka a lak rem hnuin Gabriel Martinelli chuan far post-ah chiang zetin a pet goal a, hmahruaina goal a thun. Hmahruaina goal thun tura Arsenal ball inpe kual a hmuh-nawm hle.
Hmahruaina goal an thun hnuin Gunners khel a hmuhnawm leh zual a, an mikhualte an thunun hneh hle. Mawi leh fuh taka ball an inpek kual hnuah chawlhlawk hma lawkin goal an thun belh leh. Minute 43-naah Ben White hnen atanga ball a hmuh tha tak chu Bakuyo Saka chuan lei hrulah fuh zetin a thlawlh lut a, an goal hnihna a thun. Arsenal game a tha a, chawlhlawk hmaa goal hnih an thun bawk vangin chalwhlawk a nih meuh chuan chak tur zawk a chiang thawhkhat viau tawh.
Chawlhlawk hnu lamah Arsenal an khel tha chhunzawm zel a. Goal khat chhuah ve zauh bawk mah se, Laipui tum hnih ngawt a puak zui leh ta tho thung. Second half tir lam minute 55-naah Gunners hian team goal dik tak an thawkchhuak. Mawi leh fuh taka ball inpe kual a, Crytal Palace tlarhnung an thiah hnuin Granit Xhaka chuan hnaite atangin a pet goal a, si thum faia hma an hruaina goal a thun.
Si thum ngawta hnufual tawh Crystal Palace hian goal thun ngei tumin tan an khawh a. EPL-ah a zawna shot on target nei thei lo awmchhun an ni a, hnuhma tha lo tak an neih thai chhe turin tan an khawh viau bawk. Huaisen le taima taka tan an khawh rah an seng a, goal an thun ve ta nge nge. Minute 63-naah corner atanga ball kal chang a, a dan rem te te hnuin Jeff Schlupp chuan chiang zetin a pet goal a, an si phurh a sut then ta nge nge.
Arsenal lakah goal an thun vangin phur thar mah se Palace an phur rei lo. Arsenal hian an ze pangngai an chhuah a, fuh tak taka ball an inpek kual hnuin goal an thun zui leh. Minute 74-naah Kiernan Tierney siam tha tak chu Saka chuan chiang zetin a pet goal a, si thuma hma an hruai nawn lehna goal a thun. Arsenal in goal li an thun hnu hian goal dang luh belh zui lovin inkhel a tawp a. Arsenal chuan an mualah 4-1 hnehna changin, an hmahruaina tizau tura an mamawh point thum an hlawhchhuak.
Arsenal hian game 28 atanga point 69 hmuin table-ah hma an hruai chhunzawm zel a. Point riat zela hma an hruai fal tawhin, kum 2003-04 hnu lamah EPL-ah a vawi khat nana champion thei turin hma lam an pan zel. Gunners hian point riat ngawtin hma hruai fal bawk mah se, an elpui lian ber Manchester City aiin game khatin an khel tlem zawk thung. Season kal mekah rin phakbaka khel tha tluang a, tlo em em Arsenal hian champion an tumna kawngah fiahna hautak zet an hmachhawn zui a ngai dawn a. Game 10 khelh hmabak an la neihah team lian Liverpool, Manchester City bakah top 4 luah tuma tan khawh Newcastle United te an hmachhawn a la ngai dawn. Inelna dang hmachhawn tur an neih tawh loh vangin EPL-ah champion tumin an insawrbing thei dawn a. Fiahna hautak paltlang turin an inbuatsaih tha hle ngei ang.
Arsenal in champion tuma hma lam an pan laiin Crystal Palace erawh an talbuai deuh deuh zel thung. Eagles hi 12-naa la awm bawk mahse tlahniam thei dinhmun sang bera ding West Ham United nen an inkarah point thum chiah a tla zep a, Hammers ai hian goal difference-ah an chhe zawk hial bawk. Eagles hian kar liam ta mai khan an manager Pattrick Vieira an ban a, manager thar tur zawng mekin, manager thar hnuaiah him tumin tan an khawh zui ang.
Point 8 in Arsenal an kal fal
![](https://theaizawlpost.org/wp-content/uploads/2023/03/ar-3.jpg)