Poland a dai hnuah Russia-in
Romania ram chhung a dai leh
Romania chuan an ram chung boruakah Russian drone a thlawk tih an sawi a, tun hnaia Nato rama hetiang a thlen vawi hnihna a ni ta.
Romanian indo thlawhnaten Inrinni tuka Russian-ten Ukraine an beih mek thlithlaia an chet chhuahnaah Ukraine chhim lama an inrina bulah drone hi an hmu tih defence ministry chuan a puang.
Ukrainian President Volodymyr Zelensky chuan hetiang thil hi tihsual palh a ni thei lo tih a sawi a, ‘Russia-in indona huang zauh a tumna’ chiang tak a nih thu a sawi a. Moscow erawh chuan Romanian thil sawi hi a la chhang lo.
Nilaini khan Poland pawhin an ram chunga thlawk Russian drone pathum vel an lo kap thla tawh.
Thuchhuah an siamah Romania-a defence ministry chuan Russian drone hi an ramri hrul, Ukraine-a ‘Russian-ten thlawhna hmanga Danube bul’ an kah thlithlaia chhuak F-16 thlawhna pahnihin an hmu tih an sawi.
Drone hi Chilia Veche khaw chhimthlang km 20 velah hmuin rei vak lo hnuah radar atangin a bo zui a. Mihring cheng an tamna emaw, hlauhawm thei laiah emaw a thlawk lo niin an sawi bawk.
EU foreign policy chief, Kaja Kallas chuan he thil hi ‘EU member ramten mahni kea dinga ram pakhat an nihna bawhchhiatna chiang tak thleng leh’ tiih a sawi.
Poland pawhin Inrinnia Russian drone hmuh thar leh hi a ngaihven nghal bawk a. “Polish leh a thawhpui ramte chuan kan boruak venhimna kan tichak nghal,” tiin Prime Minister Donald Tusk chuan X-ah a tar lang.
“Leia air defence system-te chu inpeih dan chikim thei ang berin an inpeih,” a ti bawk.
Kar kal ta tirah khan Russian defence ministry said chuan Polish ram beih ‘tumna an nei lo’ tih a sawi.
Russian thian tha, Belarus chuan Nilainia Polish ram china drone thlawk chu a kalna chin thununna tang vanga thleng, tihpalh a nih thu a sawi.
Pathianni khan Czech Republic chuan Poland-ah hian special operations helicopter unit a thawn a. Hetah hian Mi-171S helicopter pathum, sipai 24 leh an thuam famkim zel phur thei an ni.
Hei hi Russian-ten Nato khawchhak ramri hrul an hnaih zel vanga ramri tihchakna tur a nih thu Czech Defence Minister Jana Cernochova chuan a sawi.
President Zelensky-a chuan Russian sipaite hian ‘an drone-ten an pan lam leh engtianga hla thleng nge boruakah an thunun theih tih pawh an hre vek’ niin a sawi a. Khawthlang ramte chu na zawka Moscow hrek turin a ngen nawn.
Russia hian February, 2022 atang khan Ukraine beiin hma a sawn hret hret zel a. US President Donald Trump-a chuan indo tihtawp tumin a bei nasa hle a; mahse, President Vladimir Putin-a nena thla hmasaa Alaska-a an inbiak hnuah Moscow hi a che na sawt zawk.
Poland a dai hnuah Russia-in Romania ram chhung a dai leh
