Poland-a Russian drone lut vangin Nato-in ramria invenna tichak

Poland-a Russian drone lut vangin
Nato-in ramria invenna tichak
Russia-in rin loh taka Poland ram chung zawna drone a thlawh luhtir hnuah Nato member ram thenkhat khawchhak lama an sipai, laipui leh an air defence system an tichak thar nghal.
Nillaini zing hma takah khan Polish chung zawnah Russian drone pathum kah thlak a ni a, a dang pawh Poland khawchhak lama an luh hnuah leiah an tla bawk.
Poland chuan UN Security Council session koh an phut a, India huna Inrinni zing dar 12:30-a thut tura koh nghal a ni.
Tiam chin pela drone thlawhtir avang hian Netherlands leh Czech Republic chuan an sipaite Poland-ah an tir nghal tih an sawi a, Lithuania pawhin German brigade an mikhual nghal thu leh Russian-ten Ukraine an rûn mekna chu a kal thui ta hle tih an sawi.
Germany chuan Nato khawchhak ramriah thil a thleng tih sawiin Poland chunga boruaka invenna an tichak thar.
France President Emmanuel Macron-a pawhin Poland chung veng turin Rafale indo thlawpna pathum a tir bawk a. “Russia-in mi a tihthaih zul zel kan phal dawn lo,” a ti.
Ningania parliament-a thu a sawiah Polish Defence Minister Wladyslaw Kosiniak-Kamysz chuan an ram thawhpuiten an tawiawmna sawiin Dutch-in air defence system, laipui leh sipai 300 an tir a, Czech pawhin helicopter leh sipai 100 an tir nghal tih a sawi.
French leh British pawhin Nato khawchhak ramriah an thlawhna an dah dawn tih a sawi bawk.
Russian drone leh missile hian tun hma pawhin Nato member ramte chung a dai tawh thin a; mahse, tun hi chu Moscow-in February, 2022 atanga Ukraine a rûn la kal mek zel avangin a hmaa mite nen a inang lo.
Kremlin chuan Russia-in Poland-ah boruak thar siam a tum leh tum loh engmah a la sawi lo va, Polish leh European hruaitute erawh chuan mi dang tihthinrim tumna ni ngeia an ngaih thu an sawi hlawm.
Warsaw chuan khawchhak lama Belarus leh Ukraine nena an inrina velah drone leh boruaka chet vel a khap a, Latvia pawhin an ram khawchhak lam chung boruak chu chawlhkar khat chhung atan a khar.
Ukrainian President Volodymyr Zelensky-a chuan khawthlang ram sipaite chu Russian-ten boruak atanga an beihna laka himna tur leh an lo chhan let dan turah Ukrainian sipaiten training an pek theih reng thu a sawi.
US President Donald Trump-a chuan Poland-a thil thleng hi engmah a la sawi vak lo va, “Russia-in Poland chungah phal lohvin drone a thlawhtir a ni maw? Kan kal zel ang!” tih chauh social media-ah a la tar lang.