Mizoram Police-te fitness tha nei turin hma an la chho dawn tih Home minister K Sapdanga chuan a sawi a. Hetihlai hian police-in an man tawh sa, kudam atanga kuhva rah bo leh a awm lo tih a sawi.Thuthar thehdarhtuten an kawmnaah Home minister hian, police-te tan fitness pawimawh zia sawrkarin a hria a. An fitness a that lehzual theihna atan hma an la dawn tih a sawi. A bul tanna atan August 5 khian Mizoram Police zawng zawng a rualin zingah minute 45 chhung an parade dawn a; mahni awmna hmun theuhah parade a ni anga, Aizawlah chu a huhoin 1st Bn. MAP Playground-ah hun hman a ni dawn tih a sawi a ni.
A huhoa parade chu police-te fitness that lehzual theihna tura an bul tanna chauh a ni tih sawiin, “Mizoram Police Sports Meet pawh kalpui a ni dawn a, chutah chuan a tam thei ang an tel theih dan ruahmanna siam a ni ang. Ruahmanna dang hrang hrang pawh siam a ni,” a ti.
Zawhna chhangin Home minister chuan, police kuhva rah man sa kudam atanga a bo ang deuha sawi awm chu a dik lo tih a sawi. “Police-in kuhva rah an man sa bo a awm lo. Kudamte endik a, kuhva rah ip awm zat chhinchhiah a ni a. A hnuah manin, kudam kalh a ni. Kan man ngei dawn tih an rin avangin a neituten kan la man hma siin an lo la chhuak a. Heng kuhva rah an lo lak chhuah pawh hi police leh kuhva chingtute tangdunin engemaw zat an hmu chhuak leh tawh,” a ti.
Kuhva rah tawlhruk a reh theihna atan theihtawp an chhuah tih K Sapdanga hian a sawi a. Kawng ruk ringawt pawh 30 vel an siam a, kawng ruk helna an siam lehzel tih a sawi. “Chuti chung chuan theihtawp kan chhuah a, MNF sawrkar lai ai chuan kuhva rah tawlhruk hi a tlem tawh hle,” a ti. Police-te pawh na zawka kuhva rah tawlhruk a reh theihna atan an innawr tih a sawi bawk.
Police fit nei turin tan la dawn Man tawh sa kuhva bo awm lo – Home minister
