Mizoram sawrkarin halpuah leh halmawi lam chi a khap ho hal lui an awm a nih chuan thlalak (still photo) emaw video record emaw whatsapp-a thawnna tur police station-a phone number chu Aizawl District SP chuan a tichhuak.
Aizawl SP hian mipui ngenna tichhuakin, Krismas leh kumthar boruak tha tak hnuaia kan hman theihnan Aizawl District Police chuan dan leh thupek kenkawh hna ngawrh takin a thawk a. Krismas leh kumthar vuakveta halpuah leh halmawi zawrh leh hal chu sawrkarin a khap a. Dan bawhchhiate chu Section 223 BNS hnuaiah kumkhat thleng lung in tan emaw Rs. 5000 thleng chawitir emaw a pahniha hrem kawp theih a ni tih a sawi.
Aizawl district hnuaia police station hrang hrangin khapna thupek bawhzuiin theihtawp chhuahin halpuah leh halmawi zuar leh kawl dap hna a thawk a. Dawr, kudam leh lirthei endik thin niin, transport leh courier service pawh endik zel an ni a. Online-a zuar thinte theih ang anga chhuizui an ni bawk tih a sawi.
Sawrkarin khapna thupek a chhuahte zawm turin mipui a ngen a. Halpuah leh halmawi hal chu mihring hriselna atan a that loh bakah ranvulh tamtak thihpui thin a nih avangin mipuiin sawrkar thuchhuak zawm theuh a, police-te dan leh thupek kenkawh kawngah thawhpui turin an sawm tih a sawi a ni.
‘Halpuah hal vanga harsatna tawk leh halpuah a rem theihnana veitu tamtak kan awm tih kan hriatin thlamuan thlak kan ti a. Hnuchhui kawnga police-te tha tichak tura pui duh tan, dan bawhchhe lai thlalak emaw video record emaw police station phone whatsapp-a thawn emaw tawngkama report theih a ni,’ a ti.
Lirthei khalhtute dan zawm a, mipui himna tana hlauhawm leh harsatna siam lo turin Aizawl SP hian a ngen a. Zu leh ruihtheihthil dang rui chunga lirthei khalh lo turin a ngen. Khawlaia rui chunga lirthei khalhte endik a ni dawn, tiin, hmun hrang hrangah barricade siamin police duty dah an ni dawn tih a sawi.
Zu vanga harsatna thleng thei a nih avangin, rui buaina siam leh a zuar man an nih chuan, dan anga hrem an ni dawn tih a sawi a. Function leh programme buatsaihtute chu mipui kea kalte himna ngaihtuah chung leh lirthei tlan tibuai lo zawnga hmun remchangah buatsaih hram turin a ngen tih a sawi a ni.
Aizawlah Krismas leh kumthar boruak tha taka hman a nih theihnan leh mipui kan him theihnan Mizoram Police chuan tlawmngai pawl nen thawhhona tha tak hnuaiah hma a la a, khawpui chhunga YMA branch hrang hrang nen halpuah leh halmawi khapna thupek kenkawh kawngah an thawkho zel dawn tih a sawi bawk.
P NHal luite thlalak thawnna tur: Aizawl PS – 8794747291, Bawngkawn PS – 8794747292, Vaivakawn PS – 8794747293, Kulikawn PS – 8794747294,
Zonuam OP – 8794747295
PAizawl district-ah halpuah leh halmawi thahnem tak man tawh niin, danin a khap thil man tawh zawng zawng hlut zawng hi Rs. 21,35,555 hu a ni. Thubuai 7 ziahluh tawh niin mi 7 man an ni a, jail-a dahluh vek an ni.
PAizawl veng hrang hrangah December 21 atangin police-te zanah an duty dawn a. A tul huna rang taka che chhuak thei tur Quick Response Team atan Aizawl khawpuia police station hrang hrang 4-ah police dahbelh an ni dawn.
Police-in halpuah/halmawi hal luite thlalak thawnna tur chhuah
