Police-in Lukaku diriamtu Juve fans lakah hremna lek
Hremna chu inkhel en tura stadium chhung luh phalsak loh niin, tunthlatir lam Coppa Italia semi-final match pakhat zawka Juventus leh Inter Milan inkhelh tuma Inter mihang striker Romelu Lukaku chhaihnawmnaha diriamtu Juventus fans 171-te chu Italy rama inkhel en thei lo turin stadium luh ve police lamin an khap ta a, engtia rei nge stadium atanga danbeh an nih dawn tih erawh tarlan a ni lo.
Belgian Lukaku hian first leg-a Juve nen 1-1-a an inhnehtawk tum khan penalty a chhuihlut a, mahse, kha game-ah khan Turin club tantute’n a vun hanna hmusitin Inter striker kha penalty a pet hma, pet lai leh a hnu lam thlengin an aunawmnah tih player agent-te chuan an sawi a, he thil hi Italian thuneitute’n video awm theite endik chungin an chhui a, Juventus fans 200 dawn lakah inkhel en phal lohna thupek Thawhtanni khan Italian police-te’n an tichhuak ta a ni.
Lukaku lungawi lo chuan a goal thun lawmna atan Juventus fans a elsen zui ve ngat a, Juve fans ngawi tura hriattirna atan a kutzungtangin a hmui a tawk a, yellow card hmuh phahin, a hmaa a lo hmuh tawh nen hnawhchhuah a ni a, Coppa Italia semi-final second leg khel thei lo tur a ni.
He match-a hnawhchhuah a nih avanga match khat hremna chu Italian Football Federation (FIGC) lamin an ennawn a, Italian football-a chi inthliarna (racism) beihletna hmanrua atan Lukaku chu zanina return leg khel turin a laka hremna an hlihsak.
First leg-ah khan Inter fans lam pawhin Juventus elsen zawngin thawm leh chetzia an chhuahin an lantir ve tho tih police thuchhuah chuan tarlangin, 1985 Heysel stadium disaster behchhanin Inter tantute hian Juve an beilet tih tarlan a ni.
Police-in Lukaku diriamtu Juve fans lakah hremna lek
