Mizoram Police battalion hrang hrang tana buatsaih, chawlhkar thum awh tur State Disaster Response Force Training chu Thawhtanni khan Disaster Management & Rehabilitation director R Vanrengpuia’n 1st IR Bn Mualvumah a hawng.
Police hna thawh mek laia rikrum thilah mipui tana che chhuak tura training neih chu phurritah ngai lo turin training-a tel tura thlan police 30-te a fuih a. Chhiatna a thlenin mipui tlawmngai an tlankhawm thuai a; an pungkhawm mai a, mah se, zirthiamna nei lo tan hmun thenkhat chu a hlauhawm a; fimkhur a ngai bawk a, chuvangin zirna mumal tak neih chu a pawimawh tih a sawi a ni.
DM&R hotute sawi danin, police battalion 4-ah training zawhfel a ni tawh a, hmachhawp a la awm. Kum 2010 atang khan police 800 hnenah training pek a ni tawh a; chak lo leh pension-a chhuak an tam tawh a; mi 450 vel chauh Mizoramah hman theih an awm a; nikum September atang khan mi 188 dang training pek belh tura ruahman a ni.
Training chhungin Quick Response Team leh adventure sports lama tawnhriat neiten ni thum an zirtir hnu ah, Nation Disaster Response Force-in an zirtir chhunzawm dawn a. Theory leh practical hmanga zirtirna pek an ni ang.
Rikrum thila chhanchhuah dan zirnaah hian hliam sawngbawl dan; tanpui ngai tanpui dan; damdawi hman dan leh hmanraw hman dan an zir ang.
Police-in rikrum thila chet lak zir
