Mizoram Police Sports Meet vawi 21-na chu Zirtawpni khan Rajiv Gandhi Stadium, Mualpui Aizawlah khar a ni.
A kharna hmanpuitu Home minister Lalchamliana chuan infiamna in taksa a tih hrisel bakah police-te inkarah inunauna, inhmelhriatna, inhriatthiamna leh thawhhona tha a awm theih nana neih zel a tha tih a sawi. Hrileng vanga sawrkar sum dinhmun chhia chuan recruitment tih hleihtheih a nih loh phah tih sawiin, chuti chung chuan tuna compassionate ground-a lut mi engmawzat Police Training Centre-ah an training mek tih a sawi a ni.
All India level infiamna hrang hrangah Mizoram Police chu a langsar pawl kan ni, tiin, 71st BN Mullick Memorial Football Championship Srinagar-a neih taka Mizoram Police team an champion thei chu a chhuang takzet tih sawiin, mahni chauha an awm lai pawhin mahni invawng tha a, discipline tha tak nei reng turin a chah.
Mizoram director general of police Anil Shukla pawhin infiammite chungah lawmthu a sawi a. An hriselna leh an nun uluk taka enkawl a, ruihtheihthil laka fihlim turin a chah. Mizoram Police hmel an nih angin, mahni inthununna tha tak nen Mizoram mipui venghimtu an ni tih chu hrereng turin a chah a ni.
Mizoram Police Sports Meet 2023 hi September 18 atang khan tan a ni a, infiammi 1107 an tel. Contingent 12-a inthenin sports discipline hrang hrang – football, volleyball, basketball, badminton, tug of war, tennis, table tennis, boxing, judo, shooting, chess, carrom, chinese checker, taekwondo leh athletics-ah an inel. Gold medal 18 la in overall champion chu Central Range Contingent an ni a; pahnihna PHQ Group, pathumna Red Group an ni.
Police Sports Meet a tiak
