November ni 11-20, 2024 chhunga Rajgir Sports Complex Hockey Stadium, Rajgir, Bihar-a Women’s Asian Champions Trophy 2024 khelh zawh takah Mizo hmeichhe hockey star lian ber Lalremsiami Hmar chuan tournament thlengtu India a champion-pui satliah mai ni loin India champion theihna kawnga player thawhhlawk berte zinga mi a ni a, final-ah phei chuan Player of the Match-a thlan a ni hial nghe nghe.
Chuti ang taka Mizo player hlawhtlinna chu a chipui politician-te’n thuchhuah siamin an lawmpui tih an tarlang tliar tliar hlawm a; sports minister Lalnghinglova Hmar chuan social media-ah heti hian lawmpuina a ziak:
“Women’s Asian Champions Trophy 2024 final-ah India hmeichhe hockey team chuan 1-0-a China hnehin an champion a, Mizo nula Lalremsiami chu final-ah Player of the Match a thlan a ni.
“India hi vawithum an champion-na niin, South Korea record an nihrual nghe nghe.
“Vawi tamtak Mizoram leh Mizo lo tihmingtha tawhtu Lalremsiami ka chhuangin ka lawmpui a, hei aia sang zawk a la thleng zel ang tih kan ring tlat a ni,” tiin.
Mizorama rorel lai party ZPM |halai Headquarters pawhin an president Jeje Lalpekhlua MLA hminga Siami lawmpuina leh chawimawina thuchhuah siamin, Asia khawmualpuia ram hrang hrang – India, Japan, Malaysia, China, Thailand leh South Korea-te hockey hmanga an inelna Women’s Asian Champions Trophy 2024-a Mizo nulain India a champion-pui thei an chhuan thu an sawi a, infiamna khawvela Mizoram tihmingthatu ni zel tur leh hlawhtlinna sang zawk chang zel turin duhsakna an hlan nghal bawk.
Indian women hockey team innghahna player pawimawh tak a ni thei chu an chhuangin, an lawmpui takzet tih an tarlang tel.
Asia khawmualpui champion nih manah India hi 2028 Olympic khel turin an inhlangkai nghal bawk tih thalai pawl hian an thuchhuahah hian an zep tel a; semi-final lama sihnih faia Japan an hneh tuma Siami goal khat tihluh an sawilang tel bawk.
Congress thalai lam pawhin thuchuah siamin, khawvel hmaa India leh Mizoram tihmingthatu Lalremsiami chu thinlung taka lawmpuiin an chhuang takzet tih an sawi a, a kal zelnaah duhsakna an hlan a; kum 24 mi lek ni chunga Mizo nula chhuanawm Siami’n India tan game 151 khel tling chunga goal 41 a khung tawh thu an tarlang tel.
Politician-te lawmpui hlawh Siami
