H.Lalchhuanliana
Mizote hian kawng hrang hrangin hma kan sawn ve zel a, keini hriat phak ve chinah mai pawh hma kan sawn nasa hle a ni. Khawvel zau zawk kan hmu phak tawh a, thil tha lam leh tha lo lam thlengin kan khar chhawng nasa tawh hle a ni. Kan Mizo nun phung leh khawsak dan thleng hian ram dang tihdan kan entawn nasa tawh khawp mai. Kan hnam nunphung tha leh mawi leh kan sakhaw zirtirna pela hnam dang tih dan thenkhat kan lak (copy) erawh hi chu thil tha tak a ni lo. Kan pi leh pute kha mi pawi sawi hlau tak, aia upate zah thiam leh thenawm khawvengte tana mi hnawksak nih hlau tak an ni a. Kristian an nih hma pawh khan Zo nun ze mawi kan tihte leh Kristian zirtirna mil nunpui tlat kha an lo nei a ni. Kristian kan nih hnu hian zo nun ze mawi chu kan hloh ta mek zawk a, hnam dang tihdan, kan sakhaw tan pawha tha lo hi kan la lut ta mek zawk a ni mai em, ngaituah chian a tul ta hle mai.Kan ram hruaitute leh Politicsa inhmang zawng zawngte hian ngaihtuahna an sen a tul takzet a ni.
Politiciante thlalak/lim in halsak hi tun hma atangin kan state-ah hi chuan sawi tur ting chu awm ve bawk mah se a tam lo khawp mai. Sawrkar order duh loh vanga order copy hal erawh chu a awm ve zauh thin. Tun hnai August ni 22,2024 a Chandmary West AMC Ward No VI by election neih tur kaihhnawih thilah MNF leh Congress thalaite huaihawtin Pu K Sapdanga thlalak/ lim an hal a. Tun hma lama kan Politiciante lim hal kha tute nge tih leh a hun pawh ka hre ta mai lova, thil thleng khat tak a nih vang pawh a ni awm e. Engpawh ni se thlalak inhalsak hi kan state-ah hi chuan a tam lo khawp mai a, thil lawmawm tak pawh a niin kan sakhuana vang pawh a ni maithei e. Tun hnaia kan HM thlalak an hal kha AMC by election dawna thil thleng a ni a, han chhui zuia a chhan leh vang lam um zui emaw, politics-a hlawkpui an awm leh awm loh lam emaw pawh chhui ka tum hran lova.
Thlalak/lim inhalsak hrim hrim hian eng nge a tum, tih lam zawk hi ngaihtuah tham tak awmin ka hria.Miin thil pawi lian tham leh ram tana thil tha lo a ti a nih chuan dan anga hma la turin law court-a zualko leh kawng danga duh lohna lantir mai hi a kawng ni zawk awm tak a ni. Ram hruaitu pawimawh ber berte thlalak kan halsak hian Mizo hnam hmai a tibal a, ram rorelna chan phahna pawh a ni chuang lo. Thlalak/lim inhalsak kher hi chu, an hal taka chungah khan thil chhe ber pawh thleng se pawi an ti lo tihna nge, a haltute rilru put hmang hi chutiang chu a ni reng em, ram hmangaihna rilru atanga chhuak nge, midangte itsikna rilru leh politics-a hlawkna zawn vang zawk tih thlengin a ngaihtuah theih a ni. Thil chiang tak erawh chu kan duhsak takte lim chu kan hal ngai lova, lim hal hrim hrim hi ring lo mi hnam dang chin dan tha lo kan seng luh zing ami ngei niin a lang bawk.
Mizote hi kan la tlemin kan la inhre tawn deuh thum a, politics avanga in en hrang leh inhaw tur kan ni lo e. Political party hranga awm tak avanga kan inhmelma en mai a nih chuan, kan inpumkhatna tha tak, kan zo nun ze mawi thlengin kan hloh zel anga, kan sakhua leh kan rinna thlengin nghawng tha lo a nei thei ang. Politics leh mei hrim hrim pawh hi thlun zawm chi niin a lang lo e, remna aiin buaina leh harsatna thlentu mai a nih dan kan hriat vek hnu a nih kha. Kan Aizawl khawpui leh khaw tam takah ram buai laiin kang mei nasa tak kan tuara, a rapthlakzia kha thangthar hre pha lo tam tak an awm tawh a ni. Kan in leh kan thil neih chhun kang ral vekte kha Politics kaihhnawih vek a niin vawiin thlenga rilru dam lo an la tam a ni. Politics awmze dik tak hre chung zelin kan politics khelhna kawngah hian kan fimkhur a tul hle a ni.
Kan Pathian thu thiam leh Sakhaw hnarkaite hian Lim/ thlalak inhalsak hi kan Bible zirtirna atang hian kan tih awm a nih leh nih lohte hi han sawi thei se a tha mang e. Kohhran inzawm khawm pawl (MKHC) leh MPF te pawh hian Thlalak/Lim hal hi a awm zel lohnan hma la thei se a duhawm hle bawk a ni. Thlalak/ lim hal mai bakah tharum thawhna lam hawi zawnga Politics kalpui hi kan Kristianna nen suih zawm harsa ka la ti reng fo mai. Hawh u, tu thlalak/lim mah hi i inhalsak tawh lo teh ang u, unau inpeng tawn theuh kan la nih hi. Pathian leh kan ram tan hian Rinawmna nen tan i la tlang dial dial zawk teh ang u.