Inthlanpui a hnai a, political party-ten sawrkarna siam ngei tumin tan an la theuh a. Politics khawvela buh lu chuh hun lai a nih avangin thahnem pawh an ngai tlang; Mizoram kaihhruai an tum dan te, hmasawnna hrang hrang thawh an tum dante an puangzar leh mek a.
Hetih lai hian, mihring damkhawchhuahna atana pawimawh ber environment hian politician-te vei a hlawh zo ta lo em ni tihturin, tun dinhmunah chuan, sawirik a la hlawh chau hle a. Hun a la awm bawk a, an la sawi chhuak dawn chauh turah te pawh ngai ta ila.
A nihna takah chuan engkim innghahna bul a nih avangin environment hian political party-te manifesto-ah hmun a chang sang hle tura ngaih leh beisei a ni. Hmasawnna hnathawhna hrang hrangin kan environment a tihchhiat nasat tawh avanga tawrhna thleng mek siam tha leh tura ruahmanna kalpui an tum dan te phei chu, sawrkarna siam theih phahna tur factor pawimawh berte zingah a chhiar theih ang.
Hmasawn zel hi mihring nihphung chu a ni teh meuh mai, hma sawn zel tur pawh kan ni; chutih rualin a ‘inbuk tawk’ tura kan kal thiam loh chuan a pawi thei tih kan tawnhriat atang hian a lang mek zel chu a nih ber tawh hi.
Environment suasam nasat avanga tuihna kang mekah te pawh hian, hmalak dan turah ‘thing phun’ sawi liam satliah mai a hun tawh lo. Kan khawsak phung her danglam tum si lova, kum tin ramngaw vata hal kang dur dur reng chunga thing lo phun kha a inbuktawk lo. Thing pakhat puitlin hun chhung hi kum 10 ni se, kum sawm chhungin a let sang tam tak kan kitthlu hman zel a ni. Hei hi kan kalphung a nih avanga tun dinhmun hi thleng ta kan ni a, politician-te hian ram leh hnam dinhmun vei tak tak chunga hna an thawh a ngai a ni.
Ramdangin an neih ve zen zen loh, kan state hausakna pakhat medicinal plants te phei hi chu, tuna kan khawsak phung mek angah hi chuan, rei lo teah kan tichereu vek dawn tih a chiang em em a, hengte hi politician-te hian a thu mai ni lo, a taka hmalakna nen vei pha ve tawh se a, a duhawm hle bawk.
Environment chungchangah hi chuan sawrkarna lo chelh tawh zawng zawngte khan hma lam hun thui tak thlir pha chungin an lo vei tawk lo hle tih, ramngaw tichereu chak nihna hial kan hauh tak danah hian, a lang chiang hle.
Politician-te vei hlawh lo – Environment?
