By MC. Lalthianghlima
Politics hi ram hmangaihtute leh ram siamthat tumtute fuan khawmna hmun tur a nih laiin, politics hmanrua a hmanga eizawnna hmunpui emaw ti tlat Inrinni bazar lûn tak ang maia sumdawnna hmun emaw ti, lem chan thiam tak tak kan ngah lutuk hi buaipui tham a ni. Political party tinah hian ram vei mi, dik taka tih duh an awm vek, chutiang mi tak dik taka ram mipuite tâna rawngbawl duh mite chu “Lêm ang der thiam” vâl rualte’n an hliah tlat a, a tak aiin a lem an langsar leh si thin, mipui tam takte chuan lêm ang min der khum tih hre lovin, kum tam tak buma awmin, a lem zûnah kan uai a ni.
“Ram chu Lalpa ta a ni” tih hi kan thurin innghahna Bible-ah kan hmu a, chu ram chu a luahtute’n min petu Pathian duh ang a kan luah loh chuan, ram min petu Pathian lakah kan ti dik lo tihna a ni. Pathian thu leh politics hi a inzawm tlat a, thuneihna leh Lal-na (sorkar) fawng chelhtute’n an duh duha chin-leh a thiang lo, ram rorêltute chuan, a chhûnga chêng mipuite hmangaihna tak tak thinlung pu-in, an dinchhuahna tur ngaihtuahin ram mipuite tân rawng an bâwl tur a ni. Ram hruaitute’n ram leh mipui aia mahni nawmsakna leh pawisa ringawt an âtchilh tawh chinah chuan, politics huang ata pêt chhuah nachang kan hre tawh dawn a ni.
Khawvêl hmasawnna leh changkanna kal zêlah kan state (Mizoram) pawhin hma kan sawn ve bek bekin, kan changkan ve hmel viau angin lang thin mah ila khawpui chhûng chauh ni lo, ram mipui dinhmun dik tak thingtlang kilkhawr ber thlenga chhût neuh neuh hian, kan rethei-in kan khawngaihthlak takmeuh a ni.
He rama chêng mipui tam zawkte hi chu nitin eikhawp hmu hram hramte kan ni, chu chu engvang nge? Kan thatchhiat bîk vang em ni?. Ni lo, nitin mahni huan/lo ah chemtum huma chhuakte leh a remchang ang zêla inhlawhna zawng nitinte kan nih hi. Damloh leh damdawiin luh ngai khawpa awmte hi retheih lutuk chuan a cho awm loh lehzual bîk a sin. Politician tam tak, thuneihna leh Lal-na ringawt thlahleltute hian “Lêm ang min der san” fo avanga hetiang dinhmuna ding kan nih lek fang hi, kan thatchhiat vang a ni vek awzawnglo mai. “Zûnteii nu ka siam ang che i ti a, tahna hlir tahna hlir” tih ang mai kha kan ni.
Tûnah erawh buma kan awmzia leh lêm ang der thiam vâl kan tawn avanga kan nih tur ang ni phâk lo leh kan chanvo dik tak hmu phâk lova awm kan nihzia inhriain, lêm ang min dertute chu sîrah puan ang kan hnâwl mêk a, hma lam hun beiseina nung nên kan thlîr mêk a, rahbeha awmte tân beiseina meichher a êng a ni.
Politics hi ram siam thatna hmun a ni tih hre duh lova, pawisa leh thuneihna ringawt âtchilhtute leh policy inziah that siak mai maitute tân zahna kâwn a din hun a thleng ngei dawn a, a thleng mêk a ni. He ram hian a nih tur ang ni phâk lovin, lêm ang der thiam politician-te avangin a tuar rei tâwk ta e, tunah erawh bum an nihzia inhriain an chanvo dik tak hmu turin huaisen takin ke an pên a, chutiang mipui kum eng emaw zât lêm ang der thiam politician-te awp beh a awmte leh ram hmangaihtu dik takte chu intawng fuhin retheihna sal ata Zoram chhanchhuak turin pâr an chhuang mêk a ni.
POLITICS HI RAM SIAM THATNA TUR A NI
![](https://theaizawlpost.org/wp-content/uploads/tap_logo-min-large.jpg)