Politics hmangin mipui awlsamna
kan thlen tur a ni – Lalrindika
Politics chu ram siamna tur a ni a, hemi hmang hian mipui awlsamna kan thlen tur a ni, tiin MLA Lalrindika Ralte chuan a sawi.
Inrinnia Congress Thalai Hqrs. in local council by election neihna tur pahnih – Zemabawk leh ITI Venga Street Campaign a neihah Congress MLA Lalrindika Ralte chuan politics chu ram siamna tur a ni a, kan ram leh hnam hmasawn tir hi kan tum ber nise a duh tih sawiin, “Politics hmang hian mipui awlsamna kawng hrang hrangin kan thlen tur a ni,” a ti.
Local Council nghelnghet leh hmantlak a awm theih nan Congress party candidate-te vote tura mipui sawmin, “Pathian tihna nen lo chuan tumah tha zo kan awm loa, kan ram leh hnam zahawma siam turin kan theihna sang ber hlan ang u,” a ti.
Congress Thalai president Dr Lalmalsawma Nghaka chuan, tuna kan political party leader-te zingah MPCC president Pu Lalsawta chu kutfai ber leh mi dik, ram siamthatna kawnga experience nei tha tih chu mipui hriat dan sa a ni, tiin, hnathawk theia siam turin mipui thlawpna a ngen tih a sawi. “Congress hian pheichham tawktarh policy kan ti ve loa, rinawm leh taima taka thawkte hnenah ‘Tang puihna’ policy hmangin kan chhawmdawl dawn a ni,” a ti.
Party thenkhatin ‘That loh theih lohna bawm’ chu nuihzat thin mah se, Pu Lalsawta chuan mi fel famkim a ni bik lo tih inpawm ngamin system tha hmanga sawrkar tha min siampui a tum zawk tih sawiin Congress Thalai president chuan, “Mi lar, mi ropui leh mi hausate tha chakna hmangin sawrkarna siam kan tum loa. Mi te berte leh mi rinawmte nen tangkhawmin sawrkar tha siam kan tum a ni,” a ti.
Politics hmangin mipui awlsamna kan thlen tur a ni – Lalrindika
![](https://theaizawlpost.org/wp-content/uploads/tap_logo-min-large.jpg)