By Rosangzela, Vh – 8974138026
‘Ram tinah kraws thihna hlu chu lo thang nghal se tul tak a ni’ tih lam hi chuan lamtualah min khalh lut mawh viau; chutih laiin, ‘Vanram kan thlen hun chuan’ tih lam hian a hlawp hlawpin lamtualah min khalh lut thung. Inkhawmpui nikhuaah kan hla tuipui chu van lam ngaih hla a ni tlangpui, ni tin rim taka thawk tura kohna lam chu sirah kan hnawl daih. Ringtu lungleng tak kan ni a, vanram ngai mi kan ni, chuvangin leilung luah dan kan thiam tawk lova eng emaw hlekah ‘ral tawh mai se lei ninawm hi’ tiin kan thle kual mai mai chu a ni. Harhna chan kan chak chhan lian tak chu hlim taka lam hut hut hi a ni ber, kuthnathawh taima zawnga harhna chan te hi chak ila tha tur; thatchhiat chhuanlamah thlarau zawngin a peih, tisa erawh a chak silo kan ti zawi ruih thin anih hi. Khawvel hi kan kumhlunna tur a nih loh thu uar takin kan sawi a, khawvel thil buaipui ber lo turin kan inzirtir thin. Mahse, van lam ngaia kur kur thin, van lam ngaih hla saa lam suau suaute hian khawvel thilah duham em emin kan nung si, Lalpa sum ka ngainep a ti thinte hian sum kan atchilh bur bawk si a. Kan Kristian dan hian khawvel kan thlir dan a ti piangsual miau mai a, thawkleh khatah siam that a lo har a nih hi. Mihring nunhona kawnga pawimawh em em Politics chu sual lam awn tlatin kan hmu a, kan inzirtir bawk a. Kohhrana rawngbawltute chu Politics boruaka inhnamhnawih lo turin kan inbeisei thin a, piangthar tan Politics-a rawng neih a him lo tiin kan inchah awl lo a ni. Khawvel thil kan ti a, Pathian ram pawh beisei lem lote buaipui turin ram Politics hi kum tam tak kan lo dah tawh a ni. Hetiang hi kan ngaihdan a nih avangin ram chu a lo chhe zo ta a ni. Kohhran huangah fekfawn taka kan intih vai tingtang chhungin khawvel mi kan tih ten an lo ei zo duak duak a, an duh ang angin ram Politics an lo chichawm a. Mihausaah an lo insiam a, a ruka sawisel chungin a rukin kan tlawn leh duk duk si a, an hausakna zarzo pha nih te chu kan intihtheihna a ni zawk mah a; chinghne koham tia Party worker-te kan chhuah laiin anni lah an lo insawh muk im em si a, khuareiah kan awt leh si a nih hi maw! Party Politics hi Indian Political tradition a nih miau avangin Politics luhchilh turin Party kaltlanga khawsak a ngai a, chutak chu kan hmu khawlo zo tawh si a, a buaithlak a nih hi.
Hun rei tak chhung Politics-a ngaihdan dik lo kan intuh tawh avangin, zankhat thil thua siam that mai chi a ni tawh lo. Kan ram Politics siam tha tur hian rorelna duhtu pawl din chung chung lam a ni lo, a bulthut grass root atanga tan a tul. Tunlai chhuan te hi Politics thlir dan dik lovin a khuh buai hman tawh; chuvangin naupang sikul kal rualte hi nasa takin zirtir ila, chu chuan hun lo kal tura atan ram Politics thianghlim a siam ang. Kan Kristian dan hi siam tha ila, khawvel hi Pathianin enkawl turin min siam tih intuh nghet ila, ral tawh mai se ti tuah hum lovin. Khawvel hmasawn zelah hian keini pawh hmasawn duhin kan ring kan fan kan fan a, khawikipah ram kan vei thu kan sawi a chu chu kan titi tui ber a ni. India ram lairil zawk leh kan hmarchhakpui te kan thlir a, namen lovin hmasawnna kawng an zawh duak duak a, rual awh a na tiin kan insawh mek a ni. Kan khawsak danah kan lung a awi tawh lova, ram chu a damlo tih thu hi khawi hmunah pawh thupui thlan hlawh ber a ni. Ram siamthatna bul tan nan kuminah Pathianin kawng min hawnsak a, ram hruaitu thlangin bul kan tan dawn a ni.
Engpawhnise, khawvel thil riaua kan ruat Politics hi thlir dan dikin i thlir phawt ang u. Kan Kristianna rilru put hmang (mind set) hi zau takin her ila, piangthar tha leh Pathian au tam apiangin Politics hi luhchilh sela; a lairil lamah zuang lut sela, chuta tang chuan siamthat hna a thawh theih ang. A chhe lai siam thatu ni turin ralkhat chhaih mai lovin a boruak sa lai i luhchilh ang u. Party worker party tana inpumpekte hruai ngil tu, party office thian thianghlimtu nih hi Pathianin rawngbawlna min pek a ni ti ngam rawn pung deuh deuh rawh se. Pialral ram nuam ngaia kan kur kan kur chhung hian, ei zotuin a lo ei zo duak duak a nih hi. Kohhran tana mi tangkai kha ram Politics ah mi tangkai ni tawh sela, political party te hi thlarau thianghlim nena kuangkuah a hun ta a ni.